Վրաստանի իշխանությունները կքննարկեն ընտրական համակարգի՝ ընդդիմության առաջարկած մոդելը

Վրաստանի իշխանությունները համաձայնել են քննարկել ընդդիմության առաջարկած՝ ընտրական համակարգի բարեփոխման այսպես կոչված «գերմանական մոդելը», այս մասին հայտարարել է «Վրացական երազանք» իշխող կուսակցության ներկայացուցիչ Իրակլի Կոբախիձեն:

Նա շեշտել է, որ այդ քայլին են դիմում Վրաստանում դիվանագիտական ներկայացուցչությունների խնդրանքով: «Գերմանական մոդելը», Կոբախիձեի խոսքով, նոյեմբերի 30-ին ընդդիմության հետ նախատեսված առաջին հանդիպմանը քննարկվող թեմաներից մեկն է, և «իշխանությունները մտադիր չեն այդ հարցի վրա կանգ առնել»:

Վրաստանի իշխող ուժը, որը նախ խոստացել էր 2020 թվականի խորհրդարանական ընտրություններն անցկացնել բացառապես համամասնական ընտրակարգով, այնուհետև տապալել այդ մասին օրենսդրական նախաձեռնությունը, պնդում է, որ «գերմանական մոդելի» և երկրի Սահմանադրության միջև ակնհայտ հակասություններ կան: Ընտրական բարեփոխումներն իշխող ուժի կողմից տապալումը երկրում բողոքի մեծ ալիք բարձրացրեց. Վրաստանում երկրորդ շաբաթն է՝ բողոքի ցույցերը չեն մարում, ընդդիմությունը պահանջում է մինչև 2020 թվականը վերացնել մեծամասնական ընտրակարգը:

Խնդրի շուրջ միավորված վրացական ընդդիմադիր ուժերը միասնաբար մշակել են այսպես կոչված «գերմանական մոդել», որը բացառում է որևէ ուժի կողմից խորհրդարանական բացարձակ մեծամասնություն ունենալու հնարավորությունը: