«Թուրքիան հետընթաց է ապրում, ներկայիս իշխանությունները բանակը քարուքանդ են արել». Քեմալ Քըլըչդարօղլու

Թուրքիայի խորհրդարանում երկրորդ քաղաքական ուժի առաջնորդ Քեմալ Քըլըչդարօղլուն այսօր, քննադատելով իշխանությունների վարած քաղաքականությունը, հայտարարել է, որ Թուրքիայում տնտեսական վիճակը վատ է:

«Ամեն տանը գործազուրկ կա: 17 տարվա ընթացքում պետք է թռիչք տեղի ունենար, բայց հետընթաց է տեղի ունենում»,- ասել է նա:

Ընդդիմադիր Ժողովրդահանրապետական կուսակցության առաջնորդն իշխանությունների՝ բանակի ոլորտում վարած քաղաքականության վերաբերյալ նշել է, որ բանակը «քարուքանդ են արել»:

«Այս երկրում գլխավոր շտաբի պետին որպես ահաբեկիչ կալանավորում են, հետո ազատ արձակում: Պետության զենքի գործարանը վաճառվում է Քաթարին, մասնավորեցվում է: ԱՄՆ-ում մի նավահանգիստ վաճառվեց սաուդցիներին, բոլորն իրար խառնվեցին, իսկ այստեղ զենքի գործարան է վաճառվում»,- նշել է նա:

Ավելի վաղ Թուրքիայի իշխանություններին քննադատության էր ենթարկել Ժողովրդահանրապետական կուսակցությունից պատգամավոր Աբդյուլլաթիֆ Շեները՝ հայտարարելով, որ 17 տարի միանձնյա իշխանություն հանդիսացող «Արդարություն և զարգացում» կուսակցությունը երկիրը վատ է կառավարել: