Ինչու էր Գյումրիում ռուս զինվորականի որդին 14-ամյա հայ երեխայի դանակահարել

Գյումրիի դպրոցներից մեկի բակում անցած տարվա հոկտեմբերին անչափահասին դանակահարության մեջ մեղադրվող, Ռուսաստանի Դաշնության քաղաքացի Ալլադդինն իրեն առաջադրված մեղադրանքը մասնակի է ընդունում: Այս մասին NEWS.am-ին ասաց նրա պաշտպան Արտակ Քոչարյանը;

«Իմ պաշտպանյալն ընդունում է, որ հարվածել է տուժողին, սակայն դա արել է ինքնապաշտպանության համար, քանի որ մինչեւ այդ էլ իրեն էին մետաղյա խողովակով հարվածել»,- ասաց պաշտպանը:

Վիճաբանության պատճառը, ըստ պաշտպանի, եղել է այն, որ դպրոցում սովորող ռուս տղաներից մեկը հայ աշակերտին «բրեկետ» է անվանել, երկու կողմն իր ընկերների հետ հավաքվել է դպրոցի հետնամասում, որտեղ էլ վիճաբանությունը վերածվել է դանակահարության: Նշենք, որ Ալլադդինի հայրը Գյումրիում տեղակայված 102-րդ ռազմաբազայի զինվորականներից է:

Ըստ մեղադրական եզրակացության՝ Ռուսաստանի Դաշնության քաղաքացի Ալադդինը Գյումրիի բնակիչ Դավիթին ծաղրելու հարցի շուրջ վերջինիս առաջարկով նրա հետ պարզաբանումներ կատարելու նպատակով ընկերների հետ 2016թ. հոկտեմբերի 16-ին թիվ 19 ռուսական դպրոցի հետնամասում հանդիպել է Դավիթին և նրա ընկերներին: Նրանց միջեւ խոսակցությունը վերածվել է վիճաբանության, ինչի ընթացքում Տիգրանը մետաղյա խողովակով 2 անգամ հարվածել է Ալադդինին, իսկ նա Տիգրանին մարմնական վնասվածք պատճառելու դիտավորությամբ իր մոտ եղած դանակով 1 անգամ հարվածել է կրծքավանդակի հետին մասին՝ պատճառելով կյանքին վտանգ սպառնացող ծանր վնաս:

Ալադդինին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Գործը քննվում է Շիրակի մարզի ընդհանուր իրավասության դատարանում:

Ավելի վաղ հայտնել էինք, որ Գյումրիի 8-րդ զինվորական թաղամասում անչափահաս երեխա է դանակահարվել: Նախնական տեղեկություններով՝ վիճաբանություն էր եղել 14 տարեկան երեխաների միջեւ, վեճն ավարտվել էր դանակահարությամբ:

 NEWS.am