Ստամբուլում ապրիլի 7-ից շահագործման կհանձնվի աշխարհի խոշորագույն օդանավակայանը

Ապրիլի 7-ից Ստամբուլում շահագործման կհանձնվի քաղաքի երրորդ օդանավակայանը, որի պաշտոնական բացումը տեղի էր ունեցել հոկտեմբերի 29-ին, հայտնում է ria.ru-ն:

«Շարունակվում է համաշխարհային ավիացիայի պատմության մեջ աննախադեպ գործողություն, որը վերաբերում է Ստամբուլի նոր օդանավակայան տեղափոխվելուն: Գործողության ընդհանուր տևողությունը 45 ժամ է: Այն կավարտի ապրիլի վեցին՝ ժամը 23:59-ին»,-ասվում է Turkish Airlines-ի հաղորդագրությունում:

Դրանից հետո Աթաթուրքի անվան օդանավակայանի չվերթներն իրականացվելու են նոր օդանավակայանից:

Օդանավակայանի կառուցման բոլոր փուլերն ավարտվելու են 2023թ., ինչից հետո Ստամբուլի օդանավակայանը կդառնա աշխարհում խոշորագույնն ու տարեկան մոտ 200 մլն ուղևոր կսպասարկի: Դրա մակերեսը կկազմի 76,5 մլն քմ: Այն կունենա վեց թռիչքուղի և 500 օդանավի համար նախատեսված կայանատեղի:

Շահագործման հանձնվելուց հետո օդանավակայանը կկարողանա ընդունել աշխարհի ավելի քան 250 ավիաընկերության ինքնաթիռներ, որոնք չվերթներ են իրականացնելու ավելի քան 350 ուղղությամբ: Ծրագրված է, որ օդանավակայանից ամեն օր մեկնելու է մոտ 2000 ինքնաթիռ: