Հայաստանում սեւեր եւ սպիտակներ են, իսկ Թուրքիայում՝ կարմիրներ եւ մոխրագույներ

Bugün Türkiye'de iki ittifak karşı karşıyadır. pic.twitter.com/uRePo7rrRR

— Recep Tayyip Erdoğan (@RT_Erdogan) 27 февраля 2019 г.

Թուրքիայի նախագահ Ռեջեփ Թայիփ Էրդողանը Twitter-ի իր պաշտոնական էջում ՏԻՄ ընտրություններին վերաբերող հրապարակում է արել, որը հակասական մեկնաբանությունների ու խիստ քննադատությունների տեղիք է տվել ընդդիմությանը:

Նախագահը, մասնավորապես, գրել է, թե Թուրքիայում այսօր իրար դեմ է պայքարում երկու դաշինք՝ առանձնացնելով իր ղեկավարած «Արդարություն և զարգացում» կուսակցությանն ու իրենց աջակցող ազգայնական «Ազգային շարժմանը» մյուս բոլոր քաղաքական ուժերից:

Էրդողանն իր էջում կարմիր և մոխրագույն բաժիններից բաղկացած երկու սյունակով նկար է հրապարակել՝ կարմիր սյունակում նշելով իշխանամետ ուժերին ու նրանց՝ ազգին մատուցած ծառայությունները, իսկ մոխրագույն սյունակում թվարկել է, ըստ իրեն, ընդդիմադիրների բոլոր թերությունները՝ սյունակը վերնագրելով «Խայտառակ դաշինք»: Հրապարակման մեջ Թուրքիայի ղեկավարն ընդդիմադիրներին մեղադրել է ստախոս լինելու, անհիմն հերյուրանքի, «մութ» գործարքների մեջ լինելու, ահաբեկչությանն ու հեղաշրջման փորձի կազմակերպիչներին աջակցելու համար:

Ընդդիմադիր լրատվամիջոցները նկատել են, որ թեև ընդդիմությունը, չնայած որոշ նահանգներում համագործակցությանը, այս ՏԻՄ ընտրություններում փաստացի որևէ ընդհանուր դաշինքով հանդես չի գալիս՝ նախագահը նրանց բոլորին մեկ սյունակում է ներառել՝ փաստացի բաժանելով երկիրը երկու մասի: