Կա՞, արդյոք, Ամուլսարում ուրան

Բնապահպանները կոչ են անում լրացուցիչ ուսումնասիրություններ կատարել Ամուլսարի հանքավայրում` պարզելու համար՝ արդյոք տվյալ կամ հարակից տարածքներում ուրանի առկայությունը:

«ԷկոԼուր» հկ-ի ղեկավար Ինգա Զարաֆյանը նշեց, որ դեռ 2007-ին «Գորնի ժուրնալ»-ում հրապարակվեց երկրաբանական գիտությունների դոկտոր Գ. Պ. Ալոյանի հոդվածը, որում Ամուլսարում ուրանի պաշարները գնահատվում են 100 տոննա:

Հեղինակի խոսքով, Ամուլսարում ուրանը գտնվում է Կեչուտ գյուղից 4 կմ հարավ-արեւելք եւ նույնանուն լեռան գագաթից 5 կմ հյուսիս-արեւմուտք:

«Ամուլսարում հինգ հատվածներում հաշվարկվել է մոտավորապես 76 տոննա ուրան, իսկ հաշվի առնելով թորիումի հատվածի ուրանը նրա ընդհանուր պաշարները կարելի է գնահատել 100 տոննա», - ասվում է հոդվածում:

Հոդվածի լույս տեսնելուց հետո տարիներ շարունակ համապատասխան կառույցները այս տեղեկատվությանը պատշաճ ուշադրություն չեն դարձրել: Մինչ այդ բնապահպանները վախենում են, որ Ամուլսարում ուրանի պաշարները կարող են Ամուլսարի հանքավայրին շատ մոտ գտնվել կամ մասնակի նրա տարածքի մեջ մտնել: Նման դեպքում հանքավայրի բաց եղանակով շահագործումը եւ պայթեցման աշխատանքները կարող են լուրջ ռիսկերի պատճառ դառնալ:

«Մենք կարծում ենք, որ այս կապակցությամբ պետք է մանրամասն ուսումնասիրություններ կատարվեն, որոնց հիման վրա Հայաստանի կառավարությունը պետք է լուծի Ամուլսարի հանքավայրի շահագործման նպատակահարմարությունը:

Ուրանը ռազմավարական հումք է եւ այստեղ պետք է կառավարության կողմից տրված հատուկ լիցենզիա լինի, որը Lydian Armenia-ն չունի», - ընդգծեց Զարաֆյանը:

Lydian Armenia-ը բրիտանական Lydian International-ի դուստր ձեռնարկությունն է: Ամուլսարի նախագծի ընդհանուր արժեքը կազմում է 370 մլն դոլար: Հանքավայրի շահագործումը 10 տարի եւ 4 ամիս կտեւի, տարեկան միջինում նախատեսվում է 200 000 ունցիա ոսկի արդյունահանել: Ամուլսարի հանքավայրը Հայաստանում պաշարների մեծության թվով երկրորդն է:

Հավելենք, որ տեղացիները հունիսից շարունակում են փակել Ամուլսարի հանքավայր տանող ճանապարհը՝ իրենց բողոքն արտահայտելով դրա շահագործման դեմ: