«Սիլաչի» հյուրանոցում ռումբի մասին ահազանգը ևս կեղծ էր

Արտակարգ իրավիճակների նախարարությունը տեղեկացնում է, որ օգոստոսի 15-ին, ժամը 21:33-ին քաղաքացին ահազանգել է «911» ծառայությանը և սպառնացել, որ պատրաստվում է ռումբ տեղադրել Երևան քաղաքի Տիգրան Մեծի պողոտայում գտնվող «Սիլաչի» հյուրանոցում:

Ըստ հաղորդագրության, դեպքի վայր են մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման և Քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներական ջոկատի օպերատիվ խմբերը:

«Ժամը 22:20-ին փրկարարներն ավարտել են հյուրանոցից մարդկանց տարհանումը (120 հոգի): Ժամը 23:36-ին աշխատանքներն ավարտվել են. վտանգավոր ոչինչ չի հայտնաբերվել», - ասված է հաղորդագրությունում:

Նշենք, որ օգոստոսի 15-ին ժամը 11:21-ին մի քաղաքացին զանգել էր «911» ծառայությանը, և հայտնել, որ պատրաստվում է պայթեցնել Առողջապահության նախարարության շենքը: Ստուգումներից հետո ոստիկանությունը հաղորդեց, որ ահազանգը կեղծ է։