Ազատազրկվեց «Դատապարտյալների հիվանդանոց» մարմնավաճառներ տանելու մեջ մեղադրվող պաշտոնյան

ՀՀ ԱՆ «Դատապարտյալների հիվանդանոց» քրեակատարողական հիմնարկի դատապարտյալների հետ մարմնավաճառների տեսակցության գործով ՔԿՀ աշխատակիցներից մեկը դատապարտվել է 1 տարի 6 ամիս ժամկետով ազատազրկման: Երեւանի Կենտրոն եւ Նորք-Մարաշ Վարչական շրջանների ընդհանուր իրավասության դատարանում փետրվարի 21-ին կայացած նիստի ժամանակ կայացվել է երկու ամբաստանյալներ՝ Կարապետ Մկրտչյանի եւ Խաչիկ Խաչատրյանի դատավճիռները:

ՔԿՀ աշխատակից Կարապետ Մկրտչյանը մեղավոր է ճանաչվել առաջադրված մեղադրանքում եւ դատապարտվել է 1 տարի 6 ամիս ժամկետով ազատազրկման, իսկ մյուս ամբաստանյալ Խաչիկ Խաչատրյանը՝ պայմանական 1 տարի ժամկետով ազատազրկման:

Կարապետ Մկրտչյանը եւ Խաչիկ Խաչատրյանն առաջադրված մեղադրանքներն ընդունել էին եւ դատարանը որոշում էր կայացրել գործն արագացված կարգով քննելու:

Ավելի վաղ տեղեկացրել էինք, որ «Դատապարտյալների հիվանդանոց» ՔԿՀ պետի տեղակալի Կարապետ Մկրտչյանը եւ «Դատապարտյալների հիվանդանոց» ՔԿՀ-ի հերթապահ խմբի պատասխանատու հերթապահ Խաչիկ Խաչատրյանը հանդիսանալով պաշտոնատար անձինք պաշտոնեական դիրքը ծառայության շահերին հակառակ օգտագործելով, անձնական այլ շահագրգռվածությունից ելնելով չարաշահել են իրենց պաշտոնեական լիազորությունները, որն էական վնաս է պատճառել պետության օրինական շահերին:

Կարապետ Մկրտչյանին եւ Խաչիկ Խաչատրյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով:

Կարապետ Մկրտչյանին նկատմամբ որպես խափանման միջոց է ընտրվել կալանավորումը, իսկ Խաչիկ Խաչատրյանի նկատմամբ՝ չհեռանալու մասին ստորագրությունը՝ պաշտոնեական լիազորությունները չարաշահելը: