Միջազգային կառույցը պատրաստակամ է աջակցելու Հայաստանում գոլֆի զարգացմանը

ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանն այսօր ընդունել է The R&A միջազգային կազմակերպության՝ Եվրոպայի տարածաշրջանում գոլֆի զարգացման հարցերով տնօրեն Զոի Թաքերին: Հանդիպմանը մասնակցել է նաև Հայաստանի գոլֆի ասոցիացիայի նախագահ Կարեն Հովհաննիսյանը։

Հանդիպման ընթացքում քննարկվել են Հայաստանում գոլֆի զարգացման հեռանկարները, մարզաձևի մասսայականացման, երեխաների և երիտասարդների ներգրավման, մարզական ենթակառուցվածքների զարգացման, ինչպես նաև միջազգային համագործակցության ընդլայնման հնարավորությունները։

Զոի Թաքերը ներկայացրել է The R&A կազմակերպության գործունեությունն ու գոլֆի զարգացման ռազմավարական առաջնահերթությունները՝ ընդգծելով Հայաստանի ներուժը մարզաձևի զարգացման տեսանկյունից։ Նա կարևորել է գոլֆի հասանելիության բարձրացումը, հատկապես երեխաների, երիտասարդների և կանանց ներգրավումը՝ նշելով, որ մարզաձևի տարածման համար հնարավոր է կիրառել նաև փոքրածավալ և մատչելի ենթակառուցվածքներ։ Միջազգային կառույցը պատրաստակամ է աջակցելու Հայաստանում գոլֆի զարգացմանը՝ տրամադրելով մասնագիտական խորհրդատվություն, կրթական ռեսուրսներ և միջազգային փորձ։

Հայաստանի գոլֆի ասոցիացիայի նախագահ Կարեն Հովհաննիսյանը ներկայացրել է մարզաձևի զարգացման ուղղությամբ իրականացվող աշխատանքներն ու առաջիկա ծրագրերը։ Մասնավորապես՝ քննարկվել են հանրակրթական ուսումնական հաստատություններում գոլֆի ճանաչողական և ուսուցողական վարպետության դասերի կազմակերպման, ինչպես նաև դպրոցներում շարժական փոքրածավալ դաշտերի տեղադրման հնարավորությունները։

Անդրադարձ է եղել նաև մասնագիտական վերապատրաստման ծրագրերին, որոնց շրջանակում հնարավոր է կազմակերպել մարզիչների և կամավորների վերապատրաստում՝ միջազգային մասնագետների ներգրավմամբ։ Շեշտվել է նաև գոլֆի զարգացման զբոսաշրջային ներուժը՝ նշելով, որ մարզաձևը կարող է նպաստել ոլորտի զարգացմանը։

Կողմերը պատրաստակամություն են հայտնել շարունակելու համագործակցությունը՝ Հայաստանում գոլֆի զարգացման և մարզաձևի մասսայականացման նպատակով։