Իսրայելի ավիացիոն իշխանությունները մերժել են Ethiopian Airlines-ի բեռնատար ինքնաթիռի վայրէջքը. Ynet

Իսրայելի ավիացիոն իշխանությունները մերժել են Ethiopian Airlines-ի բեռնատար ինքնաթիռի վայրէջքի թույլտվությունն, քանի որ ստացել են տեղեկատվություն, որ օդաչուներից մեկն Ինդոնեզիայի քաղաքացի է։ «Արմենպրես»-ի փոխանցմամբ՝ այս մասին հաղորդել է իսրայելական Ynet լրատվական հարթակը։

Միջադեպը տեղի է ունեցել հոկտեմբերի 12-ին։ Հարթակի  տվյալներով՝ Ethiopian Airlines-ի բեռնատար ինքնաթիռն Ադիս Աբեբայի օդանավակայանից մեկնում էր Թել Ավիվ։ Վերելքից հետո Իսրայելի ծառայություններն ստացել էին անձնակազմի անդամների ցուցակը և պարզել, որ օդաչուներից մեկն ինդոնեզացի է։ Իսրայելի ավիացիոն կանոնների համաձայն՝ երկրի տարածք թռիչքներ չեն կարող կատարել այն օդաչուները, որոնք Իսրայելի հետ դիվանագիտական ​​հարաբերություններ չունեցող պետությունների քաղաքացիներ են։

Վայրէջքի թույլտվության մերժումից հետո ինքնաթիռը վերադարձել է Եթովպիա՝ նախապես թափելով վառելիքը։ Օդաչուն փոխարինվել է, ինչից հետո ինքնաթիռը կրկին մեկնել է Իսրայել և վայրէջք կատարել Թել Ավիվի օդանավակայանում։

Ինչպես նշում է հարթակը, Flydubai ավիաընկերության ինքնաթիռի հետ կապված միջադեպից հետո Իսրայելի իշխանությունները խստացրել են օդային տարածքի նկատմամբ վերահսկողությունը և սկսել են ավելի հանգամանալից ստուգել երկիր ուղևորվող  ինքնաթիռների անձնակազմի անդամների և ուղևորների ցուցակները։