Ադրբեջանը բողոք է ներկայացրել Գերմանիային՝ Հանինգի մասին հոդվածում Բաքվի հիշատակման կապակցությամբ

Ադրբեջանը բողոք է ներկայացրել Գերմանիային՝ գերմանական Der Spiegel պարբերականում, Գերմանիայի դաշնային հետախուզական ծառայության (BND) նախկին ղեկավար Ավգուստ Հանինգի նկատմամբ հետաքննության մասին հոդվածում Բաքվի հիշատակման կապակցությամբ։

Ըստ ադրբեջանական ԶԼՄ-ների՝ Բաքուն հատուկ ծառայությունների և դիվանագիտական ​​ուղիներով բողոքը փոխանցել է Գերմանիայի կանցլերի գրասենյակին և արտաքին գործերի նախարարությանը։

Ավելի վաղ Ադրբեջանի լրատվամիջոցների և հեռարձակման խորհուրդը հայտարարություն էր տարածել, որով հերքել էր Հանինգի հետաքննության համատեքստում երկրի մասին արտասահմանյան լրատվամիջոցների հաղորդագրությունները՝ ընդգծելով, որ դրանք չեն համապատասխանում իրականությանը և երկրի դեմ ուղղված զրպարտչական արշավի մաս են կազմում։ Խորհուրդը հայտարարել է, որ նման պնդումները լայն լսարանին որպես փաստ ներկայացնելը՝ առանց պաշտոնական աղբյուրներին հղում անելու, անընդունելի տեղեկատվական մանիպուլյացիա է։

Հոկտեմբերի 6-ին Գերմանիայի գլխավոր դատախազությունը հայտնել էր երկրի Դաշնային հետախուզական ծառայության նախկին ղեկավար Ավգուստ Հանինգի ձերբակալության մասին (պաշտոնը զբաղեցրել է 1998-2005 թվականներին): Նա կասկածվում է լրտեսության և պետական դավաճանության համար։

Գերմանական մի շարք լրատվամիջոցներ այս համատեքստում հայտնել են, որ Հանինգն իբր հանցակից Մանֆրեդ Դ.-ի փոխանցած գաղտնի տեղեկություններն օգտագործել է վերլուծական զեկույց կազմելու համար՝ ի շահ անանուն ադրբեջանական հատուկ ծառայության: