Սեուլը ԱՄՆ-ում դիտարկում է խոշոր նախագծերի իրականացման հնարավորություն

Հարավային Կորեան և ԱՄՆ-ը համաձայնեցրել են Տեխասում նախատեսվող գազային նախագծում Սեուլի հնարավոր ներդրման չափը՝ շուրջ 22,3 միլիարդ դոլար։ Այս մասին հայտնում է հարավկորեական Edaily պարբերականը՝ վկայակոչելով անանուն պաշտոնյաների և քաղաքական գործիչների։

Նախագիծը նախատեսում է Տեխաս նահանգի Էնսինալ քաղաքում 6,3 գիգավատ հզորությամբ գազային էլեկտրակայանի կառուցում։ Լրատվամիջոցների տվյալներով՝ այն պետք է ապահովի արհեստական բանականության տվյալների կենտրոնների կողմից էլեկտրաէներգիայի աճող պահանջարկը։

Հնարավոր ներդրումը նախատեսվում է իրականացնել երկու երկրների միջև նախորդ տարի կնքված առևտրային համաձայնագրի շրջանակում։ Այդ պայմանավորվածությամբ Հարավային Կորեան պարտավորվել էր ԱՄՆ-ում կատարել ընդհանուր առմամբ 350 միլիարդ դոլարի ներդրումներ՝ հարավկորեական ապրանքների նկատմամբ ավելի բարենպաստ ամերիկյան մաքսատուրքերի դիմաց։

Միևնույն ժամանակ դեռևս հստակ չէ՝ Տեխասի գազային նախագծի ամբողջ ֆինանսավորումը ստանձնելու է արդյոք Հարավային Կորեան։ Սեուլը ԱՄՆ-ում դիտարկում է նաև այլ խոշոր նախագծերի իրականացման հնարավորությունը, այդ թվում՝ ատոմակայանի կամ Ալյասկայում հեղուկացված բնական գազի ենթակառուցվածքի կառուցումը։

Սակայն Հարավային Կորեայի արդյունաբերության նախարարությունը հերքել է Տեխասի նախագծի վերաբերյալ հրապարակված որոշ մանրամասներ՝ դրանք անվանելով ոչ ճշգրիտ։ Գերատեսչությունը հայտնել է, որ Սեուլի և Վաշինգտոնի միջև խորհրդակցությունները դեռ շարունակվում են, ուստի նախագծի կոնկրետ պայմանները հաստատել առայժմ հնարավոր չէ։

Նախարարության փոխանցմամբ՝ Հարավային Կորեայի կառավարությունը պաշտոնական հայտարարություն կանի միայն ԱՄՆ-ի հետ բանակցությունների ավարտից և անհրաժեշտ ընթացակարգերի, այդ թվում՝ խորհրդարանի հաստատման հարցի քննարկումից հետո։

Միաժամանակ նախարարությունը հայտարարել է, որ ԱՄՆ-ում նոր ատոմակայան կառուցելու վերաբերյալ այս պահին որևէ որոշում չի ընդունվել։

radararmenia