ԱՄՆ-ը պատրաստ է օգնություն ցուցաբերել Վենեսուելային երկու հզոր երկրաշարժերի կապակցությամբ. Թրամփ

ԱՄՆ նախագահ Դոնալդ Թրամփը հայտարարել է, որ Վաշինգտոնը պատրաստ է ցանկացած անհրաժեշտ օգնություն ցուցաբերել Վենեսուելային երկրում տեղի ունեցած երկու հզոր երկրաշարժերի ֆոնին:

Նա ընդգծել է, որ բոլոր կառավարական գերատեսչություններին արդեն հանձնարարել է անհապաղ արձագանքել: Թրամփը խոստացել է, որ ԱՄՆ-ը կլինի Վենեսուելայի ժողովրդի կողքին, և նշել է, որ ստացվող առաջին տվյալները լուրջ անհանգստություն են ներշնչում:

Ավելի վաղ Վենեսուելայում 39 վայրկյան տարբերությամբ տեղի է ունեցել 7,2 և 7,5 մագնիտուդով երկու երկրաշարժ: Վենեսուելայի ներքին գործերի նախարար Դիոսդադո Կաբելոն հայտնել է, որ ամբողջ երկրում փլուզվել են շենքեր, տներ և բնակելի կառույցներ: Նախագահի պաշտոնակատար Դելսի Ռոդրիգեսը հայտնել է, որ նախնական տվյալներով՝ զոհվել է 32 մարդ, ավելի քան 700-ը՝ վիրավորվել: Նա, սակայն, նախազգուշացրել է, որ տուժածների թիվը կարող է աճել։ Երկրում հայտարարվել է արտակարգ դրություն: