Կուսակիցները փակ հանդիպմանը կոշտ քննադատության են ենթարկել Թրամփին

ԱՄՆ նախագահ Դոնալդ Թրամփը հանրապետական կուսակիցների հետ փակ հանդիպմանը ենթարկվել է կտրուկ քննադատության՝ Իրանի հետ պատերազմի պատճառով։ Դա տեղի է ունեցել կարճ ժամանակ անց այն բանից հետո, երբ նրա վարչակազմը դիմել է Կոնգրեսին՝ հակամարտության ծախսերը հոգալու համար տասնյակ միլիարդավոր դոլարներ հատկացնելու խնդրանքով։

Ըստ Reusters-ի՝  Թրամփը վեճի է բռնվել հանրապետական սենատոր Բիլ Քեսիդիի հետ։ Վերջինս հայտարարել է, որ վարչակազմը պետք է բացատրի անցյալ շաբաթ Թրամփի ստորագրած շրջանակային համաձայնագիրը։ Այն ֆինանսական խթաններ է նախատեսում Իրանի համար, սակայն չի հասնում այն նպատակներից և ոչ մեկին, որոնք նախագահը մատնանշել էր պատերազմի սկզբում։

«Ամերիկացի ժողովուրդը պետք է ավելին իմանա, քան մեզ ասում են»,- լրագրողներին հայտարարել է Քեսիդին։ «Թեև չեմ կարող հաստատապես պնդել, բայց թվում է, թե իրադարձությունները չեն զարգանում այնպես, ինչպես մեզ ասում էին»։

Թրամփը չի հիշատակել Քեսիդիի հետ ունեցած խոսակցությունը, սակայն ավելի ուշ քննադատել է Սենատի քվեարկությունը։

«Իրանը տեսնում է սա և հարցնում՝ «ի՞նչ է սա ընդհանրապես նշանակում»։ Իսկ հիմա դուք հասկանում եք, որ դա անիմաստ է, այնպես չէ՞»,— Սպիտակ տանը լրագրողներին ասել է Թրամփը։

Մի քանի ժամ անց Թրամփի վարչակազմը դիմել է Կոնգրեսին՝ պատերազմի ծախսերը հոգալու համար 70 միլիարդ դոլար հատկացնելու խնդրանքով, ինչը ԱՄՆ ռազմական բյուջեն հասցրել է 867 միլիարդ դոլարի։