Եվրոպայում հայտարարվել է վտանգի ամենաբարձր մակարդակ

Ֆրանսիայում, Իսպանիայում և Արևմտյան ու Կենտրոնական Եվրոպայի այլ երկրներում հայտարարվել են ծայրահեղ շոգի մասին կարմիր նախազգուշացումներ: Օդերևութաբանները կանխատեսում են, որ առաջիկա օրերին տապն միայն ուժգնանալու է, և օդի ջերմաստիճանը կարող է գերազանցել 40°C-ը:

Ֆրանսիայում եղանակային վտանգի ամենաբարձր մակարդակ է հայտարարվել երկրի տարածաշրջանների ավելի քան կեսում: «Météo-France» օդերևութաբանական ծառայության տվյալներով՝ երկուշաբթի օրը Բորդոյում ջերմաստիճանը հասել է 42°C-ի, և կրթության նախարարության հրամանով հարյուրավոր դպրոցներ ժամանակավորապես փակվել են:

Վտանգի ամենաբարձր մակարդակի նմանատիպ նախազգուշացումներ են հայտարարվել նաև Գերմանիայի, Իտալիայի, Շվեյցարիայի և Լյուքսեմբուրգի իշխանությունների կողմից:

Շատ եվրոպական երկրներում շոգի գագաթնակետը սպասվում է չորեքշաբթի օրը։ Մասնավորապես, Փարիզում օդերևութաբանները կանխատեսում են մինչև 41°C:

Ջերմաստիճանի բարձրացումը պայմանավորված է Սահարա անապատից դեպի հյուսիս շարժվող տաք օդային զանգվածների ներթափանցմամբ։ Այս հոսքը նպաստում է յուրօրինակ «ջերմային գմբեթի» ձևավորմանը, որը տաք օդը պահում է տուժած տարածաշրջանների վրա։ Օդերևութաբանների գնահատականներով՝ ներկայիս շոգը կարող է դառնալ վերջին տարիների ամենաերկարատևներից մեկը։

Գիտնականները նշում են, որ ծայրահեղ շոգի պարբերական ալիքները գլոբալ տաքացման ամենից նկատելի դրսևորումներից են։ Ֆրանսիական «Météo-France» ծառայության տվյալներով՝ 1947 թվականից ի վեր Ֆրանսիայում արձանագրված շոգի 51 ալիքներից 34-ը գրանցվել է 2000 թվականից հետո, իսկ 26-ը՝ 2011 թվականից հետո։