ԵՄ-ն կսկսի Ուկրաինայի անդամակցության վերաբերյալ բանակցությունների առաջին պաշտոնական փուլը

Եվրոպական Միության Խորհրդում նախագահող Կիպրոսը հայտարարել է Ուկրաինայի և Մոլդովայի՝ ԵՄ անդամակցության վերաբերյալ առաջին բանակցային «կլաստերի» պաշտոնական բացման նախապատրաստական աշխատանքների մասին։

Կիպրոսի նախագահության պաշտոնական էջում հրապարակված հայտարարության համաձայն՝ այս քայլը կարևոր հանգրվան է երկու երկրների եվրոպական ինտեգրման ճանապարհին և վկայում է ԵՄ-ի միասնության ու վճռականության մասին։

«Առաջիկա օրերին կշարունակենք նպատակային աշխատանքը՝ Խորհրդի քննարկումներն ավարտելու և առաջին կլաստերի շուրջ բանակցությունները պաշտոնապես սկսելու համար»,- նշված է հայտարարության մեջ։

Ուկրաինան և ԵՄ-ն դեռ մարտին փորձագիտական մակարդակով ավարտել էին անդամակցության բանակցությունների բոլոր կլաստերների նախնական քննարկումները։ Կիպրոսի նախագահ Նիկոս Քրիստոդուլիդեսն ավելի վաղ հայտարարել էր, որ Ուկրաինայի եվրոպական ինտեգրումը Կիպրոսի նախագահության առաջնահերթություններից է։