Թրամփը Ծոցի երկրներից ակնկալում է միանալ «Աբրահամի համաձայնագրերին»

Axios-ը գրում է, որ ԱՄՆ նախագահ Դոնալդ Թրամփը շաբաթ օրը կայացած հեռախոսազրույցի ընթացքում Սաուդյան Արաբիայի, ԱՄԷ-ի, Կատարի, Պակիստանի, Թուրքիայի, Եգիպտոսի, Հորդանանի և Բահրեյնի ղեկավարներին հայտնել է, որ Իրանի հետ պատերազմի ավարտից հետո ակնկալում է նրանց միացումը «Աբրահամի համաձայնագրերին» և հարաբերությունների կարգավորումը Իսրայելի հետ։ 

Ամերիկյան պաշտոնական աղբյուրների փոխանցմամբ՝ Թրամփի այս պահանջը, հատկապես Իսրայելի հետ պաշտոնական կապեր չունեցող Սաուդյան Արաբիայի, Կատարի և Պակիստանի առաջնորդների շրջանում, անակնկալ է առաջացրել և կարճատև լռության պատճառ դարձել։

Չնայած արաբական երկրները լիակատար աջակցություն են հայտնել Իրանի հետ պատրաստվող համաձայնագրին, Իսրայելի հետ մերձեցման հարցում իրավիճակը բարդ է մնում։

Թրամփը սոցիալական ցանցերում հայտնել է, որ Մերձավոր Արևելքի երկրների հետ համագործակցությունն էլ ավելի կամրապնդվի նրանց՝ «Աբրահամի համաձայնագրերին» միանալուց հետո, և նույնիսկ հույս է հայտնել, որ ապագայում Իրանը նույնպես կարող է մի օր ճանաչել Իսրայելն ու միանալ դրանց։ 

ԱՄՆ սենատոր Լինդսի Գրեմն իր հերթին բացահայտ աջակցություն է հայտնել Թրամփի պահանջին՝ զգուշացնելով արաբական և մուսուլմանական դաշնակիցներին, որ հրաժարվելու դեպքում դա կարող է խիստ բացասական հետևանքներ ունենալ Վաշինգտոնի հետ ապագա հարաբերությունների վրա։

Սաուդյան Արաբիայի թագաժառանգ արքայազն Մոհամմեդ բին Սալմանը, ով նախկինում ավելի հակված էր Իսրայելի հետ կապերի հաստատմանը, վերջին շրջանում սառեցրել է իր դիրքորոշումը։

Էր-Ռիադը շարունակում է որպես նախապայման պահանջել Իսրայելի կողմից պաղեստինյան պետության ստեղծման հստակ հանձնառություն, ինչը կտրուկ մերժվում է Իսրայելի ներկայիս աջակողմյան կառավարության կողմից։ Վերլուծաբանները կարծում են, որ Սաուդյան Արաբիան որևէ կոնկրետ քայլի չի դիմի, մինչև չտեսնի Իսրայելի ընտրությունների արդյունքները։