Թեժ գիշեր Վաշինգտոնում

Սպիտակ տան անցակետի մոտ հնչել են տասնյակ կրակոցներ, ինչի հետևանքով լրագրողները պատսպարվել են ճեպազրույցների դահլիճում: Ո՞վ է հարձակվողը, որն իրեն «Աստված» ու «Բեն Լադեն» է անվանում, և ինչպե՞ս են զարգացել իրադարձությունները Երևանի ժամանակով կիրակի գիշերը:

Թեժ գիշեր Վաշինգտոնում. ի՞նչ է տեղի ունեցել Սպիտակ տան մոտ

Ամերիկայի Միացյալ Նահանգների մայրաքաղաքը կրկին հայտնվել է լրատվամիջոցների ուշադրության կենտրոնում: Սպիտակ տան անցակետերից մեկի մոտ հնչել են տասնյակ կրակոցներ: Ուշագրավ է, որ Դոնալդ Թրամփը չեղարկել էր այս հանգստյան օրերին Նյու Ջերսիի գոլֆի ակումբ գնալու իր որոշումը  և մնացել էր Վաշինգտոնում:

Այդ պատճառով վարչակազմի առանցքային դեմքերը՝ աշխատակազմի ղեկավար Սյուզի Ուայլսը, Ֆինանսների նախարար Սքոթ Բեսենթը և փոխնախագահ Ջեյ Դի Վենսը, նույնպես Սպիտակ տանն էին՝ նախագահի հետ ընթացիկ հարցերը քննարկելու համար: Միջադեպը զարգացել է հենց այն պահին, երբ պաշտոնյաները, ավարտելով քննակումը, հերթով լքել են համալիրի տարածքը, ինչը ֆիքսել են CNN-ի տեսախցիկները:

Խաղաղության պայթյունը և Գաղտնի ծառայության պատասխանը

Երևանի ժամանակով կիրակի գիշերը՝ ժամը 2-ից քիչ անց՝ Վաշինգտոնի ժամանակով շաբաթ երեկոյան 18-ից հետո, Սպիտակ տան անմիջապես հարևանությամբ՝ 17-րդ փողոցի և Փենսիլվանիա պողոտայի խաչմերուկում, իրավիճակը կտրուկ լարվել է: Երիտասարդ տղամարդը հարևանությամբ գտնվող Starbucks սրճարանի մոտակայքից  կրակ է բացել անվտանգության պահակակետի ուղղությամբ, որտեղ հերթապահել են համազգեստավոր սպաները: Աղբյուրների փոխանցմամբ՝ հնչել է 15-ից 30 կրակոց:

Ըստ CNN–ի՝ գաղտնի ծառայության սպաները գործել են արագ և պրոֆեսիոնալ. նրանք պատասխան կրակով վնասազերծել են հարձակվողին: Վերջինիս ծանր վիճակում տեղափոխել են հիվանդանոց, որտեղ բժիշկները գրանցել են նրա մահը: Փոխհրաձգությունից տուժել է նաև անցորդներից մեկը, որի վիճակը ծայրահեղ ծանր է գնահատվում: Պարզ չէ՝ նա տուժել է անվտանգոթյան աշխատակիցների, թե՞՝ հարձակվողի կրակոցից։ Իրավապահների շրջանում տուժածներ չկան, նախագահ Թրամփը ևս չի տուժել:

«Ցա՛ծր նստեք, կրակոցներ են». սարսափի 40 րոպեները

Կրակոցները հնչել են այն ժամանակ, երբ լրագրողներն ավարտել էին աշխատանքը, բայց դեռ տարածքում էին: ABC News-ի գլխավոր թղթակից Սելինա Վանգը պատմել է, որ Սպիտակ տան Հյուսիսային մարգագետնում iPhone-ով տեսանյութ էր նկարում, երբ կրակոցների ձայներ լսվեցին։ Գաղտնի ծառայության գործակալները հրահանգել են ճեպազրույցների դահլիճ մտնել:  Շուրջ երկու տասնյակ լրագրողներ, լուսանկարիչներ ու պրոդյուսերներ մոտ 40 րոպե պատսպարվել են այդ դահլիճում՝ սպասելով իրավիճակի հանգուցալուծմանը։

Ո՞վ էր հարձակվողը. «Աստված», «Բեն Լադեն» և մոլուցք Սպիտակ տան հանդեպ

Իրավապահները արագ պարզել են հարձակվողի ինքնությունը: Նա 21-ամյա Նասիր Բեստն է Մերիլենդ նահանգից։ Վերջին մեկուկես տարում բնակվել է Վաշինգտոնում: Պարզվել է, որ երիտասարդը հոգեկան առողջության լուրջ խնդիրներ ունի և արդեն տևական ժամանակ անվտանգության մարմինների ուշադրության կենտրոնում է:

Անցյալ տարվա հունիսին էլ նա փակել էր Սպիտակ տան մուտքերից մեկը ՝ հայտարարելով, թե ինքն «Աստվածն է» ու «Հիսուս Քրիստոսի ժամանակակից մարմնավորումը»։ Այդ միջադեպից հետո նա տեղափոխվել էր հոգեբուժարան։ Ընդամենը մեկ ամիս անց դարձյալ փորձել էր ներխուժել Սպիտակ տան տարածք, ինչի համար ձերբակալվել էր, իսկ դատարանը նրան արգելել է մոտենալ այդ տարածքին։ Սոցցանցերում քննիչները գտել են նրա տարօրինակ գրառումները, որտեղ նա պնդել է, թե ինքն է «իսկական» Ուսամա բեն Լադենը, և պետք է  վնասի Դոնալդ Թրամփին։

Մտահոգիչ շղթա. Թրամփի դեմ մահափորձերը

Լրատվամիջոցները հիշեցնում են, որ նախորդ միջադեպը տեղի էր ունեցել ընդամենը մեկ ամիս առաջ՝  թղթակիցների ասոցիացիայի ամենամյա ընթրիքի ժամանակ, որին մասնակցում էին Դոնալդ Թրամփն ու Մելանյա Թրամփը: Ընթրիքն ապրիլի վերջին էր «Washington Hilton» հյուրանոցում: Այն ժամանակ անվտանգության աշխատակիցները տարհանել էին նախագահին, իսկ հարձակվողը՝ 31-ամյա Քոուլ Թոմաս Ալենը, վնասազերծվել էր և մեղադրվում է նախագահի դեմ մահափորձի մեջ: Հաշվի առնելով հանգամանքը, որ Դոնալդ Թրամփը դեռ 2024 թվականի նախընտրական քարոզարշավի ժամանակ էլ մի քանի մահափորձերի թիրախ էր դարձել, անվտանգության հարցը դառնում է օրհասական՝ շեշտում է BBC-ին:

Ինքը՝ Թրամփը, «Truth Social»-ում արված գրառմամբ շնորհակալություն է հայտնել իրավապահներին և նշել է, որ այս դեպքը ևս մեկ անգամ ապացուցում է՝ Ամերիկայի ապագա նախագահներին անհրաժեշտ է երբևէ կառուցված ամենապաշտպանված ու անվտանգ աշխատանքային տարածքը, քանի որ դա է պահանջում երկրի ազգային անվտանգությունը:

Դեպքի վայրում Գաղտնի ծառայությանն աջակցում է ՀԴԲ-ն՝ տնօրեն Քեշ Փաթելի գլխավորությամբ, իսկ Սպիտակ տան հարակից փողոցները դեռ փակ են՝ քննչական գործողությունների պատճառով:

armradio.am