Գվարդիոլան արդեն այնքան հանդիպումներ է անցկացրել, որ ես չեմ համարձակվի նրան խորհուրդներ տալ

Մադրիդի «Ռեալի» գլխավոր մարզիչ Ալվարո Արբելոան նախախաղային մամուլի ասուլիսի ժամանակ խոսել է Չեմպիոնների լիգայի 1/8 եզրափակիչի՝ «Մանչեսթեր Սիթիի» դեմ կայանալիք պատասխան հանդիպման, թիմի կադրային խնդիրների և իր ապագայի մասին։ «Ես ցանկանում եմ տեսնել նույնպիսի «Ռեալ», ինչպիսին առաջին խաղում էր։ Մեր նպատակն է դուրս գալ խաղադաշտ և գործել նույն համեստությամբ ու նվիրվածությամբ։ Հարկավոր է նույնիսկ ավելին անել, քանի որ բարդ է լինելու։ Եթե ցանկանում ենք անցնել հաջորդ փուլ, պետք է հանդես գանք նույն բարձր մակարդակով կամ նույնիսկ ավելի լավ. մենք քաջ գիտակցում ենք վաղվա հանդիպման բարդությունն ու մրցակցի ուժը»,- նշել է մարզիչը։

Անդրադառնալով ֆուտբոլիստների մարզավիճակին՝ Արբելոան ընդգծել է, որ Կիլիան Մբապեն արդեն ապաքինվել է, իսկ Ջուդ Բելինգեմը դեռ պատրաստ չէ խաղալուն. «Բելինգեմն ինքն է ցանկացել լինել թիմի հետ։ Նա մեր առաջատարներից է, և նրա ներկայությունը կարևոր է, բայց վաղը նա խաղադաշտ դուրս չի գա։ Ինչ վերաբերում է Մբապեին, նա արդեն պատրաստ է, վաղն ինքներդ կտեսնեք։ Կիլիանը մեզ այլ որակներ է տալիս, բայց նա նաև կարողանում է հիանալի փոխգործակցել խաղընկերների հետ և խելացիորեն ազատ գոտիներ գտնել»։

Արբելոան չի շրջանցել նաև Պեպ Գվարդիոլայի որոշումը՝ խաղից առաջ չեղարկել «Սիթիի» մարզումը և հանգիստ տրամադրել ֆուտբոլիստներին. «Գվարդիոլան արդեն այնքան հանդիպումներ է անցկացրել, որ ես չեմ համարձակվի նրան խորհուրդներ տալ։ Նրա թիմի խաղացողները շատ լավ գիտեն միմյանց. նրանք կարող են նույնիսկ փակ աչքերով խաղալ, քանի որ երկար տարիներ միասին են հանդես գալիս»։

Խոսելով մադրիդյան ակումբում իր ապագայի մասին՝ մասնագետն ասել է, որ դա իրեն այս պահին ամենաքիչն է անհանգստացնում. «Ապագաս վերջին բանն է, ինչի մասին հիմա մտածում եմ։ Գլխավորն այն է, որ վաղվա խաղը շարունակի ոգեշնչել մադրիդիստներին։ Ես այստեղ կլինեմ այնքան, որքան անհրաժեշտ է, և գոհ կլինեմ մինչև իմ վերջին աշխատանքային օրը»,- Իսպանացի մասնագետի խոսքերն է մեջբերում իսպանական AS պարբերականը։

«Մանչեսթեր Սիթիի» և Մադրիդի «Ռեալի»  միջև պատասխան հանդիպումը կկայանա մարտի 17-ին և կմեկնարկի Երևանի ժամանակով 00:00-ին։ Մադրիդում կայացած առաջին խաղում «արքայական» ակումբը վստահ հաղթանակ էր տարել 3-0 հաշվով։

armsport.am