ՀՀ-ն պետք է տեր կանգնի Արցախին, չեք լռեցնի մեզ․ բողոքի ակցիա՝ Կառավարության շենքի դիմաց

Այս պահին արցախցի ուսանողներն ու մի խումբ քաղաքացիներ բողոքի ակցիա են իրականացնում ՀՀ կառավարության շենքի դիմաց։
Նրանք մտահոգված են Արցախում ստեղծված իրավիճակով, շատերը չեն կարողանում կապ հաստատել Արցախում գտնվող ընտանիքի անդամների հետ։
Հավաքվածները հայաստանյան իշխանություններին պահանջում են կանխել Արցախում սկսված պատերազմը։
«Նույնիսկ այսօր առավոտյան Ալեն Սիմոնյանը շանտաժ է անում ժողովրդին՝ ասելով, եթե ավել ձայներ չտաք, որ անցնենք, ավելի վատ է լինելու։ Նրանք Արցախում տեղի ունեցող ցեղասպանություն օգտագործում են հօգուտ ներքաղաքական շահի։ ՊՆ-ն Սուրեն Պապիկյանի գլխավորությմաբ տեսե՞լ եք՝ ինչ հայտարարություն է արել, ասում են՝ Հայաստանի սահմաններին հանգիստ է, ասել է թե՝ մենք ձեզ հետ կապ չունենք, իրենց թողեք՝ ցեղասպանվեն։ ՀՀ-ն պետք է տեր կանգնի Արցախին, տեր կանգնի՝ 120 000 հայի, չեք լռեցնի մեզ»,- հայտարարեց ակցիայի մասնակիցներից մեկը՝ հավելելով, թե Նիկոլ Փաշինյանը ցեղասպանում է Արցախը։
Մեկ այլ քաղաքացի էլ հայտարարեց, որ Արցախում տեղակայված խաղաղապահները ոչինչ չեն անում արցախցիների անվտանգությունն ապահովվելու համար՝ պնդելով, թե նրանք ծառայում են ադրբեջանա-թուրքական տանդեմին և պետք է հեռացնել։
Ակցիայի մասնակիցներից, 44-օրյա պատերազմում զոհված զինվորի մայր Ալիսա Գևորգյանի խոսքով էլ նրանք, ովքեր սահմանից այս կողմ են գտնվում, մեկ անելիք ունեն։
«Պետք է հեռացնել սահմանից այս կողմ գտնվող թշնամուն, որպեսզի հասկանանք, թե ինչ կարող ենք անել»,- հավելեց նա։