Կարմիր խաչը այցելել է Ադրբեջանի կողմից առեւանգված Վագիֆ Խաչատրյանին. նա ընտանիքին երկտող է փոխանցել

Կարմիր խաչը երեկ՝ օգոստոսի 7-ին, այցելել է Ադրբեջանի կողմից հուլիսի 29-ին առեւանգված 68-ամյա Վագիֆ Խաչատրյանին: Այս մասին NEWS.am-ին հայտնեց Վագիֆ Խաչատրյանի դուստր՝ Վերա Խաչատրյանը:

«Մենք հնարավորինս պայքարում ենք, որպեսզի կարողանանք հայրիկիս հետ բերել: Ասացին՝ դեղեր է խմում իբր թե բուժման համար: Բայց իր հիվանդությունը բուժելի հիանդություն չէ, այլ վիրահատական է: Կարմիր խաչից երկտող են փոխանցել, որում գրված է՝ «լավ եմ, ձեր մասին եմ մտածում, սաղություն լինի, կգամ»»,- պատմեց Վերա Խաչատրյանը:

NEWS.am-ի հետ զրույցում Խաչատրյանի մյուս դուստրը՝ Ծովինար Խաչատրյանն ասաց, որ իր հայրը որեւէ հանցանք չի գործել. «Հայրս անմեղ է: Նա աղերս չունի Ադրբեջանի կողմից ներկայացված հանցանքների հետ»։

Դուստրը պատմեց, որ Կարմիր խաչի ներկայացուցիչները 2 անգամ այցելել են Վագիֆ Խաչատրյանին. «Մեկ անգամ այցելել են հուլիսի 29-ի երեկոյան, եւ մեկ անգամ էլ երեկ կեսօրին է այցելել: Առաջին անգամվա այցելությունից հետո մեզ փոխանցեցին, որ հորս վիճակը կայուն չէ, գտնվում է հիվանդանոցում: Երեկ փոխանցել են, որ օգոստոսի 1-ից հորս տեղափոխել են Ձերբակալվածների պահպանման վայր, եւ ընդունում է դեղորայք՝ օրը երկու անգամ»։

Հիշեցնենք, որ հուլիսի 29-ին Ադրբեջանի սահմանապահ ծառայության ներկայացուցիչները Բերձորի միջանցքում ապօրինի տեղակայված ադրբեջանական «անցակետից» առեւանգել են վիրահատության նպատակով Կարմիր Խաչի միջազգային կոմիտեի միջոցով Արցախից Հայաստան տեղափոխվող 68-ամյա Վագիֆ Խաչատրյանին։

Ադրբեջանի գլխավոր դատախազությունը հայտարարել է, թե «նրան մեղադրանք է առաջադրվել» դեռ 2013-ին, նրան կալանավորելու որոշում է կայացվել, եւ որ նույն թվականին «միջազգային հետախուզում է հայտարարվել»։ Ձերբակալված արցախցուն Բաքուն մեղադրում է «ցեղասպանության, ադրբեջանցիների տեղահանության մեջ»։ Մի քանի օր է՝ Հայաստանում Վագիֆ Խաչատրյանին ազատ արձակելու պահանջով ցույցեր են տեղի ունենում։