Հայրս չի եղել Սամվել Բաբայանի վարորդը, դա կեղծ լուր է. Վագիֆ Խաչատրյանի դուստր

Ադրբեջանը այնպիսի փաստեր է ներկայացնում, որ բացարձակապես իրականությանը չի համապատասխանում, ու ես չգիտեմ ոնց ապացուցել: Այս մասին այսօր՝ հուլիսի 31-ին, ՄԱԿ-ի երևանյան գրասենյակի դիմաց լրագրողներին ասաց Վերա Խաչատրյանը՝ ադրբեջանցիների կողմից առևանգված արցախցի 68-ամյա Վագիֆ Խաչատրյանի դուստրը:

«Վերջերս էլ ասում էին, որ Սամվել Բաբայանի վարորդն է եղել: Հարգելիներս, դա կեղծ լուր է։ Հայրս չի եղել Սամվել Բաբայանի վարորդը: Իմ հայրն այնպիսի անձնավորություն է՝ զուսպ, հավասարակշռված, բարիության կերպար: Այն, ինչ ներկայացրել է Ադրբեջանի ղեկավարությունը, այդ ամենը կեղծ է: Իսկ նկարները, որ համացանցում տարածվել է, որտեղ իբր երիտասարդ տարիքում հայրիկս է, դա եւս ոչ մի կապ չունի հորս հետ, դա հայրս չէ, չգիտեմ՝ ում նկարն են տեղադրում: Հիմա պետք է բոլորով օգնեք, որ հայրիկիս ողջ ու առողջ վերադարձնենք: Հայրիկս դուք եք, ձեզնից յուրաքանչյուրն է: Մենք միասնական ազգ ենք, մենք միասին հայրիկիս ենք վերադարձնելու, ես վստահ եմ: Ես խնդրում եմ ինչ-որ կերպ տեղեկություն բերել հայրիկիցս»,-հուզված ասաց դուստրը:

Նա տեղեկացրեց, որ Կարմիր խաչից առաջին օրը զանգել ու տեղեկացրել են, որ տեսել են հայրիկիս Բաքվի հիվանդանոցներից մեկում. «Կարծես դա լավ բան է: Իսկ ես ուզո՞ւմ եմ, որ իմ հայրը լինի Բաքվի հիվանդանոցներից մեկու: Ես իրեն հայրենիք էի բերում բուժելու, այն հույսով, որ տեղ կհասնի, ողջ առողջ հետ կգնա իր տուն: Հայրս արժանապատիվ իր 68 տարիներն ապրել է: Իսկ հիմա գնա ու դառնա ադրբեջանցու գերի՞:

Ես դիմում եմ բոլորին, նույնիսկ Ադրբեջանի դատախազությանը. Ճշտեք բոլոր ձեր հրապարակած նյութերը, դա ոչ մի աղերս չունի ճշմարտության հետ: Հայրս այդպիսի հանցանքներ չի իրագործել, ինքն առհասարակ տեսակով այդպիսինը չէ»,-ասաց Վերա Խաչատրյանը: