Արցախում բաբայանական թեւն չեզոքացնելու «օպերացիա» են մշակել

«Իրավունք» թերթը գրում է. «Արցախի ԱԺ նախագահ Արթուր Թովմասյանը նախորդ շաբաթ Ազգային ժողովի հերթական նիստի ժամանակ հանդես եկավ հայտարարությամբ` կոչ անելով նախագահ Արայիկ Հարությունյանին հրաժարականի դիմում ներկայացնել կամ վստահության հանրաքվե անցկացնել: Նա վստահեցրել է, որ եթե ժողովուրդը Արայիկ Հարությունյանին անվստահություն հայտնի, ապա ինքն էլ կհեռանա ԱԺ նախագահի պաշոտնից:

Շատերը ցնցված են Արցախում ներքաղաքական այսպիսի շրջադարձից, իսկ ոմանց համար ամեն ինչ շատ ակնհայտ է:

«Իրավունքի» աղբյուրների փոխանցմամբ`այս հայտարարությունն անմիջականորեն համաձայնեցված է Արայիկ Հարությունյանի հետ: Ավելին` վստահության հանրահաքվեն լիովին հնարավոր է, որ անցկացվի հունիսի վերջին կամ հուլիսի սկզբին:

Սրանով Արայիկ Հարությունյանն ու Արթուր Թովմասյանը նպատակ ունեն Արցախում չեզոքացնել սամվելբաբայանական թեւին: Այլ կերպ ասած` ցույց տալ «Միասնական հայրենիք» կուսակցության նախագահ Սամվել Բաբայանին եւ նրա համակիրներին, որ վերջիններս Արցախում իշխանության գալու որեւէ հնարավորություն չունեն»:

Մանրամասները՝ թերթի այսօրվա համարում