Իրանում սուզանավերի դեմ պայքարի համար անօդաչու սարք են մշակել

Իրանի ռազմածովային ուժերը ստեղծել են անօդաչու թռչող սարք (ԱԹՍ), որը կարող է հայտնաբերել թշնամու սուզանավերն ու նավերը և ոչնչացնել դրանք: Այդ մասին Интерфакс -ի փոխանցմամբ՝ երեքշաբթի Tasnim գործակալությանը հայտնել է ռազմածովային ուժերի հրամանատար, փոխծովակալ Շահրամ Իրանին:

«Մենք անօդաչու թռչող սարքերի վրա օգտագործում ենք սոնարներ և այլ սարքավորումներ՝ սուզանավերը հայտնաբերելու նպատակով», – ասաց նա:

Նա հավելել է, որ այդ անօդաչու թռչող սարքերն արդեն սպառազինության մեջ են, սակայն չի ներկայացրել այդ զենքի տեխնիկական մանրամասները: Tasnim-ը հիշեցնում է, որ 2022 թվականի նոյեմբերին Իրանի Իսլամական Հանրապետության ղեկավար այաթոլլա Ալի Խամենեին ռազմածովային ուժերի հրամանատարների հետ հանդիպման ժամանակ նրանց մատնանշել է միջազգային ջրերում իրանական նավերի ներկայությունը պահպանելու, նրանց մարտական հնարավորությունները մեծացնելու, ինչպես նաև հեռավոր ջրատարածքներում գործունեությունը շարունակելու անհրաժեշտությունը։

Երեքշաբթի օրը Իրանում բանակի օրվան նվիրված զորահանդեսի ժամանակ, մասնավորապես, ցուցադրվել են երկրում մշակված բազմաթիվ անօդաչու թռչող սարքեր: Դրանց թվում ցուցադրել են «Մոհաջեր-6» դրոնը, որն ունակ է կառավարելի ավիացիոն ռումբեր և ժամանակակից հետախուզական սարքավորումներ կրել, և իրանական առաջին լայնաֆյուզելաժ մարտական անօդաչու թռչող սարքը՝ «Քաման-22» – ը, որի թռիչքի հեռահարությունը կազմում է շուրջ 3 հազար կմ: