«Ինտերը» բանակցում է «Բրայթոնի» գլխավոր մարզիչի հետ

Միլանի «Ինտերը» բանակցում է անգլիական «Բրայթոնի» գլխավոր մարզիչ Ռոբերտո Դե Ձերբիի հետ, հաղորդում է Tuttosport-ը։

Իտալական ակումբի ղեկավարությունը փոխարինող է փնտրում իտալացի Սիմոնե Ինձագիին եւ դիտարկում է անգլիական թիմի 43-ամյա իտալացի մարզիչի թեկնածությունը։

Ինձագին «Ինտերը» գլխավորում է 2021 թվականից։ Նրա պայմանագիրը նախատեսված է մինչեւ 2024թ․ հունիս։

Դե Ձերբին 2022-ին է գլխավորել «Բրայթոնը»։ Մարզչական կարիերայի ընթացքում նա աշխատել է նաեւ իտալական «Պալերմոյում», «Բենեւենտոյում», «Սասուոլոյում», ուկրաինական «Շախտյոր Դոնեցկում»։