Իրանի ԱԳՆ-ն Ադրբեջանին կոչ է արել բացատրել Իսրայելի հետ հակաիրանական համագործակցությունը

Ադրբեջանի իշխանությունները պետք է բացատրեն իրենց «հակաիրանական համագործակցությունն» Իսրայելի հետ։ Այսպիսի հայտարարություն է արել Իրանի ԱԳՆ-ի պաշտոնական ներկայացուցիչ Նասեր Քանաանին, տեղեկացրել է ԻՐՆԱ գործակալությունը։

Նա Իսրայելի արտաքին գործերի նախարար Էլի Քոհենի խոսքերն «Իրանի դեմ միասնական ճակատ ձեւավորելու» մասին անվանել է եւս մեկ վկայություն այն բանի, որ Իսրայելը ջանում է Ադրբեջանի տարածքը վերածել ազգային անվտանգության սպառնալիքի Իրանի համար։

«Իրանի Իսլամական Հանրապետությունը միշտ փորձել է խանգարել անբարյացակամներին՝ հարեւան երկու երկրների միջեւ հեռավորություն ստեղծելու հարցում, եւ ակնկալում է, որ Ադրբեջանի կառավարությունը եւս կխուսափի երկու երկրների թշնամիների լարած ծուղակներից։ Ակնհայտ է, որ Իրանը չի կարող անտարբեր մնալ իր դեմ Ադրբեջանի Հանրապետության տարածքից սիոնիստական վարչակարգի դավադրության հանդեպ»,- ասել է նա։ Քանաանին ընդգծել է Իրանի եւ Ադրբեջանի միջեւ պատմական եւ կրոնական անխզելի կապի մասին։

Իսրայելի արտաքին գործերի նախարար Էլի Քոհենը, Թել Ավիվում Ադրբեջանի Հանրապետության դեսպանության բացման կողքին, հայտարարել է նաեւ Բաքվի հետ հակաիրանական համագործակցության խորացման մասին։