Մոուրինյո․ Ծանր հանդիպում էր, խաղադաշտն ահավոր վիճակում էր

«Ռոմայի» պորտուգալացի գլխավոր մարզիչ Ժոզե Մոուրինյոն մեկնաբանել է «Լեչեի» հետ 1:1 հաշվով ոչ ոքի արդյունքը Իտալիայի առաջնության 22-րդ տուրի արտագնա խաղում։

«Ծանր հանդիպում էր։ Ակնհայտ է, որ մեր ակնկալած արդյունքը չէ։ Խաղադաշտը ահավոր վիճակում էր, մեծ խնդիրներ ունեցանք մեկ հպումով փոխանցումներում, գնդակը տարօրինակ անդրադարձ էր ունենում խաղադաշտից։ Հեշտ չէր որակով ֆուտբոլ ցուցադրելը։

Իմ ֆուտբոլիստների մասին ոչ մի վատ բան չեմ կարող ասել։ Նաեւ չեմ կարող ասել, որ 2 միավոր կորցրեցինք»,- Մոուրինյոյի խոսքը մեջբերում է DAZN-ը։

22 խաղից հետո «Ռոման» 41 միավորով չորրորդն է։ Նույնքան միավոր ունեն երրորդ տեղում գտնվող «Ատալանտան» եւ 5-րդ տեղը զբաղեցնող չեմպիոն «Միլանը»։