Ալիեւն ու Օվերչուկը քննարկել են Հարավային Կովկասում հաղորդակցությունների ապաշրջափակման հարցը

Ադրբեջանի նախագահ Իլհամ Ալիեւը եւ ՌԴ փոխվարչապետ Ալեքսեյ Օվերչուկը քննարկել են Հարավային Կովկասում հաղորդակցությունների ապաշրջափակման եւ Հյուսիս-Հարավ միջազգային տրանսպորտային միջանցքի եռակողմ աշխատանքային խմբի գործունեությունը։

«Զրույցի ընթացքում քննարկվել են տրանսպորտային-տնտեսական կապերի ապաշրջափակման նպատակով ստեղծված եռակողմ աշխատանքային խմբի գործունեության հարցերը»,-հայտնել է Ալիեւի մամուլի ծառայությունը։

Բացի այդ, կողմերը մտքեր են փոխանակել Հյուսիս-Հարավ միջազգային տրանսպորտային միջանցքի եւ փոխադարձ հետաքրքրություն ներկայացնող այլ հարցերի շուրջ։

«Հանդիպմանը գոհունակություն է արտահայտվել ադրբեջանա-ռուսական հարաբերությունների դինամիկ զարգացման եւ տարբեր ոլորտներում երկրների միջեւ համագործակցության ներկա վիճակի կապակցությամբ»,-ասվում է հաղորդագրության մեջ։