Արոնյանն ընդդեմ Հայաստանի հավաքականի

Հնդկաստանի Չենայ քաղաքում անցկացվող շախմատի Համաշխարհային օլիմպիադայի 7-րդ տուրում Հայաստանի հավաքականը կմրցի ԱՄՆ-ի թիմի հետ, որի կազմում առաջին անգամ հանդես է գալիս Հայաստանի թիմի նախկին առաջատար, Օլիմպիադայի եռակի չեմպիոն Լեւոն Արոնյանը։

7-րդ տուրը կանցկացվի օգոստոսի 5-ին։

Նախորդ տուրերում Հայաստանի հավաքականը հաղթել է Մադագասկարին (4:0), Անդորրային (3:1), Եգիպտոսին (2,5:1,5), Ավստրիային (3:1), Անգլիային (2,5:1,5), Հնդկաստանի երկրորդ թիմին (2,5:1,5) եւ 12 միավորով գլխավորում է մրցաշարային աղյուսակը։

ԱՄՆ-ի հավաքականը հաղթել է Անգոլային (3,5:0,5), Պարագվային (2,5:1,5), Վրաստանին (3:1), Իսրայելին (2,5:1,5), Իրանին (2,5:1,5), ոչ ոքի խաղացել Ուզբեկստանի հետ (2:2) եւ 11 միավորով երկրորդն է։

Կանանց Հայաստանի թիմը 7-րդ տուրում կմրցի Իսրայելի հավաքականի հետ։

Համաշխարհային օլիմպիադայում կանցկացվի 11 տուր։