Թեհրանի եւ Բաքվի միջեւ հարաբերությունների զարգացման ներուժ կա. Ռաիսի

Աշխաբադում Կասպյան հնգյակի գագաթաժողովի շրջանակներում կայացել է Ադրբեջանի եւ Իրանի նախագահներ Իլհամ Ալիեւի եւ Էբրահիմ Ռաիսիի հանդիպումը։

Ինչպես հաղորդում է Armenia.Az-ը՝ վկայակոչելով Ադրբեջանի նախագահի մամուլի ծառայությանը, հանդիպմանը Ալիեւն ասել է, որ «երկու երկրների միջեւ շատ լավ առաջընթաց է ձեռք բերվել մի շարք հարցերում, հատկապես՝ տրանսպորտի, էներգետիկայի եւ այլ ուղղություններով»։

Ռաիսին իր հերթին հայտարարել է, որ Ալիեւի՝ Թեհրան, ինչպես նաեւ Իրանի նախագահի՝ Բաքու այցի պլաններ կան։ Նրա խոսքով՝ Բաքվի եւ Թեհրանի հարաբերությունները զարգացման ներուժ ունեն։ «Կարծում եմ, որ մենք դեռ չենք կարողացել օգտագործել մեր հարաբերությունների ամբողջ ներուժը։ Կարծում եմ, որ երկու երկրների միջեւ քաղաքական, տնտեսական, առեւտրային եւ մշակութային հարաբերությունները կարող են ավելի զարգանալ»,- ընդգծել է Ռաիսին։

Խոսելով երկու երկրների հարաբերությունների պատմության մասին՝ Ռաիսին հավելել է. «Իրանի Իսլամական Հանրապետությունն ապացուցել է, որ դժվար օրերին իր հարեւանների բարեկամն է եւ երբեք չի թողնում իր ընկերներին դժվարությունների մեջ», հաղորդվում է Իրանի նախագահի կայքում։
Ռաիսին ընդգծել է, որ Իսրայելի ներկայությունը տարածաշրջանում ոչ մի կերպ չի նպաստում տարածաշրջանի անվտանգությանը։ Տարածաշրջանում անվտանգությունը հնարավոր է ձեռք բերել միայն տարածաշրջանի եւ դրա կասպյան հարեւանների համագործակցության միջոցով, նշել է նա։