Արդյոք Բախշիյանի օրինակը ձեզ չի՞ վախեցնում՝ այս գործով անաչառ որոշում կայացնելու համար. Առուշանյանի պաշտպանը՝ դատարանին

Վերաքննիչ քրեական դատարանում՝ նախագահությամբ դատավոր Ռուբիկ Մխիթարյանի, այսօր՝ փետրվարի 8-ին, Գորիսի համայնքապետ Առուշ Առուշանյանի նկատմամբ ընտրված խափանման միջոց կալանքը գրավով փոխարինելու մասին միջնորդության քննությանը պաշտպանները դատարանին ինքնաբացարկի միջնորդություն չներկայացրին ժամանակի սղության պատճառով։

Ինքնաբացարկի միջնորդություն հայտնելու կամ չհայտնելու համար պաշտպան Էրիկ Ալեքսանյանը դատարանին մի քանի հարց ուղղեց.

«Ձեր համոզմամբ, եթե Առուշանյանին ազատ արձակելու օրինական հիմքերը լինեն, արդյոք կկայացնե՞ք նման դատական ակտ, չունենալով մտավախությունը, որ հետագայում կարող եք ենթարկվել քրեական հետապնդում, ընդհուպ կալանավորվել։ Ուզում ենք հասկանալ՝ մենք գործ ունե՞նք օրինական դատարանի հետ։ Որովհետեւ դուք այն դատավորն եք, որը 6 ամիս առաջ կալանավորել է Արմեն Չարչյանին՝ անձեռնմխելիության ու կալանավորման հետ անհամատեղելի պայմաններում։ Դուք այն դատավորն եք, որը կալանավորեց Մանվել Փարամազյանին, որն ազատության մեջ գտնվելով, դրսեւորել է պատշաճ վարքագիծ։ Դուք 2 տարի առաջ հակասահմանադրական հոդվածով կալանավորել եք ՀՀ երկրորդ նախագահ Ռոբերտ Քոչարյանին։ Այս ամեն ինչը վկայում է այն մասին, որ դուք չեք ունեցել երբեք համարձակություն՝ կայացնել անառաչ որոշում։ Եվ արդյոք Բախշիյանի օրինակը չի՞ վախեցնում ձեզ՝ այս գործով կայացնել անաչառ որոշում»։

Դատավորն էլ նշեց, որ իր ունեցած տվյալներով՝ այդ դատական ակտերից որեւէ մեկը բեկանված չէ։

Ալեքսանյանի խոսքով՝ դատարանն իրեն գոյացնող պատասխան չտվեց, սակայն ինքնաբացարկի միջնորդություն չեն ներկայացնի՝ ժամանակի սղության պատճառով։

«Այս կյանքում ոչինչ հավերժ չէ, այդ թվում՝ քաղաքական իշխանությունը։ Այս պատմական էջը թերթելու ենք, այլ ուղղակի պատռելու ենք»,- ընդգծեց Ալեքսանյանը։

Հիշեցնենք, որ Գորիսի համայնքապետ Առուշ Առուշանյանը մեղադրվում է համայնքի ընտրողներից առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով, ԱԺ արտահերթ ընտրությունների (որին ինքը մասնակցում էր «Հայաստան» դաշինքի ընտրական ցուցակով) նախընտրական քարոզարշավի ընթացքում ուղղակի դիտավորությամբ ծանր հանցագործություն նախապատրաստելու, այն է` ընտրություններին մասնակցելու եւ «Հայաստան» դաշինքի օգտին կողմ քվեարկելու համար երկու կամ ավելի ընտրողի կաշառք տալու մեջ՝ ՀՀ ՔՕ 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով եւ 38-154.2-րդ հոդվածի 3-րդ մասով:

Բացի այդ, ըստ մեղադրանքի, Առուշ Առուշանյանը Գորիս համայնքի Քարահունջ բնակավայրի վարչական ղեկավար Լուսինե Ավետյանի միջոցով կազմակերպել է նույն բնակավայրի ընտրողներին 2021 թվականի հունիսի 20-ին նշանակված ԱԺ արտահերթ ընտրություններին մասնակցելուն եւ «Հայաստան» դաշինքի օգտին կողմ քվեարկելուն հարկադրելը:

Առուշանյանն իրեն առաջադրված մեղադրանքը չի ընդունում։ Նրա պաշտպաններն էլ այդ քրեական գործերը որակում են որպես քաղաքական հետապնդում Առուշանյանի նկատմամբ։