Իշխանությունները թքեցին բանակի ողջ պատմության վրա. Արտակ Զաքարյան

Իշխանությունները թքեցին բանակի ողջ պատմության վրա, իրենց անհարգալից վերաբերմունքը ցուցաբերեցին բանակի և ընդհանրապես Հայաստանի երրորդ հանրապետության, այսինքն՝ նորագույն պատմության նկատմամբ։ Այս մասին NEWS.am-ի հետ զրույցում ասաց ՀՀ պաշտպանության նախկին փոխնախարար Արտակ Զաքարյանը:

«Բանակի օրը մենք չնշեցինք։ Սա հերթական ծանր հարվածն էր Հայաստանի հեղինակությանը։ Պատճառն այն էր, որ իշխող ուժը Հայաստանի Հանրապետության դեմ է, բանակը նրանք են քանդել և նրանց դավադիր քաղաքականության արդյունքում է Հայաստանը հայտնվել ծանր մարտական պարտության մեջ՝ կորուստներով լիքը և արյունով շաղախված։ Եվ նրանց նպատակը չէ Հայաստան պետություն կամ հայակական բանակ ունենալը։ Դրա համար նրանք առանց խղճի խայթի կարող են և նաև բանակի տոնը չնշել։ Նրանց նպատակը հայ ժողովրդին կործանելն ու սերնդազրկելն է, այն, ինչ ուզում են թուրքերն ու ադրբեջանցիները։ Եթե մեր կառավարության ղեկավարը լիներ թուրք կամ ադրբեջանցի, ազգային բանակի տոնը կնշե՞ր, թե՞ չէր նշի։ Իրենք էլ են ասում, որ թուրք են, չենք հավատում: Ալիևն էլ, Նիկոլն էլ ասում են, որ Հայաստանը պետք է բանակ չունենա, հետևաբար սկսել են չնշելուց, ի՞նչը նշեն, եթե պետք է բանակ չունենա»,- ասաց նա:

Անդրադառնալով «Եռաբլուրում» Քպ-ական պատգամավորների վարքագծին, նախկին փոխնախարարն ասաց, որ չեն հասկանում` որտեղ են գտնվում:
«Նրանք չեն եղել բանակի ակունքներում կանգնած, զինվոր չեն եղել, նրանք չեն եղել այդ բանակը մարտի տանողը, նրանք չեն եղել կռվող հրամանատարն ու զինվորը։ Ընդամենը իրենց թանկագին ժամանակից մի քանի րոպե նվիրաբերել են հայրենիքին՝ իբրև ծաղիկ դնելուն լպիրշ ծիծաղով, և վստահ եմ, որ ընդհանրապես նրանց մտքում ոչ մի կաթիլ պատկերացում չկա, թե ինչ է հայրենիքը, դրա համար նահատակված մարդու հիշատակ հարգելը, ինչ է Եռաբլուրն ընդհանրապես։ Դրա համար, ինչպես Աստվածաշունչն է ասում, մարգարիտները չի կարելի շաղ տալ խոզերի առաջ և ընդհանրապես քննարկել ՔՊ հասկացությունը քաղաքականության և հայ ժողովրդի պատմության արժեքային դաշտի մեջ»,- ասաց նա։
Զաքարյանի կարծիքով ուժային կառույցների բանակի օրվան նվիրված ուղերձ չհղելը վերեւից եկած հրաման է եղել:

«Միանշանակ պետական ինստիտուտներին ասել էին, որ մոռացեք բանակի տոնի մասին, չի եղել նման բան, չկա բանակ, ինչ-որ խմբավորումներ են, ինչ-որ սահմաններ են պահում, շուտով հայելային հետքաշում հիմարությունն էլ կգործարկեն ու Հայաստան պետությունը սահման հասկացություն էլ չի ունենա, իսկ պետական սահման չունենալով ի՞նչ պետության մասին է խոսքը։ Հայաստանը դառնալու է հողամաս՝ տարածք, որտեղ ապրում են Նիկոլի ընտրողները, որոնք խելք չունեն և պատրաստ են թուրքին էլ, ում էլ ասես՝ ծառայել»,- նշեց նա։

Արտակ Զաքարյանի խոսքով` զորքերի «հայելային հետքաշումը» Հայաստանի Հանրապետության անվտանգության ու պաշտպանունակության ոչնչացման ամենակարճ ճանապարհն է. «Ի՞նչ հայելային հետքաշում, եթե այդ տարածքները օկուպացված են, պետք է օկուպացիայից ազատվեն մեր սուվերեն տարածքները։ Խելքի գալու ժամանակն է։ Սրանց հետ բոլոր ճանապարհները տանում են դժոխք և կործանում։ Մեր ապագան, որի մասին խոսում են, դժոխքն է և կործանումը։ Եթե ուզում ենք գնալ, ապա հանգիստ էլ գնում ենք, ամեն ինչ ապացուցում են, ամեն ինչ պարզ, հստակ է։ Եթե մինչև պատերազմը ամեն ինչ փակ, գաղտնի ձևով էին անում, շատ քիչ մարդ էր տեսնում, որ սրանք կործանում են պետությունը, պատերազմի ամբողջ ընթացքում և պատերազմից հետո բացահայտ են կործանում»։
Պաշտպանության նախկին փոխնախարարի խոսքով սխալ է օգտագործել «բանակ չկա» հասկացությունը, քանի որ բանակից այնուամենայնիվ ինչ-որ բան մնացել է և մնացած ստորաբաժանումներն այսօր շատ ավելի մարտունակ են, քան Ադրբեջանինը։

«Բայց սրանք ուզում են տակի մնացած բանակն էլ քանդել, կործանել, սա ակնհայտ է։ Նրանք չէին պատկերացնում, որ մեր բանակն այնքան կայացած, ուժեղ և մարտունակ է, որ այդքան փորձություններից, դավադրություններից, քաղաքականապես դավաճանելուց հետո էլ մնացել է։ Նրանք վերջին 1․5 տարվա ընթացքում բանակի վրա ոչ մի էական ծախս չեն արել, վերականգնման համար ոչ մի գործողություն չեն արել։ Մեր սպաներից ինձ գրում են, որ արդեն սնունդն էլ այն աստիճանի խայտառակ վիճակում է, որ 1992-93 թվականներին չի եղել։ Սա խայտառակություն է։ Իսկ բանակի տոնը պետք էր նշել, որովհետև դա մեր պետության ինստիտուցիոնալ ամենակարևոր ձեռքբերումն է եղել 30 տարիների ընթացքում, բանակն է ստիպել հարգել պետության շահերը, հայ ժողովրդի անվտանգությունն այս ընթացքում, և բանակի շուրջ են կայացել շատուշատ ինտիտուտներ, հատկապես՝ անվտանգային։ Իսկ ամենակարևորը՝ այսօր հայ ժողովուրդն այսօր այն վիճակում է, որ նրա բարոյական ոգին բարձրացնելու անհրաժեշտություն կա։ Իսկ սրանք ուղղակի կործանեցին այս ամենը։ Սրանք հայ մարդուն դուխ տալու միայն մի նպատակ ունեն․ Նիկոլին ընտրել, խաբել, Նիկոլին ընտրել։ Եթե այդքան անխելք մարդ են գտել Հայաստանում, որ կարողանում են այսքան խաբել, ուրեմն Հայաստանը ներսից քանդելու թշնամու ծրագիրը շատ լավ աշխատում է»,- եզրափակեց նա։