Մեսին Instagram-ում հետևորդների թվով շրջանցել է Քիմ Քարդաշյանին

Կատալոնական «Բարսելոնայից» ազատ գործակալի կարգավիճակով հեռացած Լիոնել Մեսին դարձել է Instagram-ում երկրորդ ամենաշատ հետևորդ ունեցող աստղը: Նրա հետևորդների թիվը հասել է 245 միլիոնի:

Արգենտինացի հարձակվողը շրջանցել է ամերիկյան հեռուստաաստղ Քիմ Քարդաշյանին, որն Instagram-ում ունի 243 միլիոն հետևորդ:

Այդ ցուցանիշով Մեսիին ու Քարդաշյանին գերազանցում է միայն Թուրինի «Յուվենտուսի» պորտուգալացի հարձակվող Կրիշտիանու Ռոնալդուն է: 36-ամյա ֆուտբոլիստն Instagram-ում ունի 325 միլիոն հետևորդ:

Հիշեցնենք, որ Լիոնել Մեսին օգոստոսի 10-ին կժամանի Փարիզ և բուժզննում կանցնի ֆրանսիական ՊՍԺ-ում: Նա ՊՍԺ-ի հետ կկնքի 2 տարվա պայմանագիր, որը կունենա ևս մեկ տարով երկարաձգելու հնարավորություն: Փարիզյան ակումբում 34-ամյա ֆուտբոլիստի տարեկան աշխատավարձը կկազմի 35 միլիոն եվրո՝ առանց բոնուսների: