Ժիրինովսկին ադրբեջանցի պաշտոնյաներին հանդիմանել է խոսքի ազատության սկզբունքն անտեսելու համար

Ռուսաստանի Լիբերալ-դեմոկրատական կուսակցության (ՌԼԴԿ) առաջնորդ Վլադիմիր Ժիրինովսկին, մեկնաբանելով իր խոսքերից հետո Ադրբեջանի ԱԳՆ-ի հայտնած բողոքը, հայտարարել է, որ բարձր է գնահատում երկրի նախագահ Իլհամ Ալիևին, ինչպես նաև իրավունք ունի իր կարծիքը հայտնելու:

«Մենք գտնվում ենք այնտեղ (Հարավային Կովկասում՝ խմբ.), մեզ խնդրել են: Եվ ես, ՌԼԴԿ-ն դեմ ենք դրան: Ինքներդ գլուխ հանեք: Այդ իսկ պատճառով ի՞նչ բողոքի նոտաներ կարող են լինել»,- ասել է Ժիրինովսկին՝ պատասխանելով ՏԱՍՍ գործակալության հարցմանը:

Ժիրինովսկին նկատել է, որ Ալիևին բազմիցս անվանել է «իմաստուն ղեկավար»: «Նրա հայրն ավելի լավն էր: Ես գովաբանել եմ և՛ Իլհամ Ալիևին, և՛ նրա հորը: Իսկ եթե ինչ-որ պաշտոնյաներ վատ են պատկերացնում իրավիճակը և որոշել են ինչ-որ նոտա հանձնել ժամանակավոր հավատարմատարին, ապա նրանք, ինչ է, չգիտե՞ն խոսքի ազատության մասին»,- ասել է քաղաքական գործիչը:

Հիշեցնենք, որ ավելի վաղ Ադրբեջանի ԱԳՆ-ն բողոոքի նոտա էր հանձնել ՌԴ գործերի ժամանակավոր հավատարմատարին՝ կապված Ժիրինովսկու հայտարարությունների հետ, որոնց համաձայն՝ «Ադրբեջանում բռնապետություն է, և եթե Բայդենը ցանկանա, Ալիևին գահընկեց կանեն երկու շաբաթվա ընթացքում, և նրան կկարողանա փրկել միայն Ռուսաստանը»: Բացի այդ, Ժիրինովսկին շեշտել էր, որ «Ռուսաստանը պետք է վերադառնա Ռուսական կայսրության և ԽՍՀՄ բոլոր տարածքներ»՝ Հարավային Կովկասն անվանելով «իրենց ազդեցության գոտին»: