Մակրոնը ողջունել է ֆրանսիական ակումբների՝ Սուպերլիգային չմիանալու որոշումը

Ֆրանսիայի նախագահ Էմանուել Մակրոնն աջակցել է ֆրանսիական ակումբների՝ նորաստեղծ Սուպերլիգային չմիանալու որոշմանը:

«Նախագահը ողջունում է ֆրանսիական ակումբների դիրքորոշումը Սուպերլիգային չմասնակցելու վերաբերյալ: Մրցաշարը սպառնում է միասնության սկզբունքին ու սպորտային վաստակին:

Ֆրանսիայի ղեկավարությունն աջակցում է ֆրանսիական ֆեդերացիայի ու լիգայի, ՈւԵՖԱ-ի, ՖԻՖԱ-ի բոլոր քայլերը մրցումների ամբողջականության պաշտպանության հարցում»,- ասվում է Ֆրանսիայի նախագահի մամուլի ծառայության հայտարարությունում:

ВВС-ի համաձայն՝ Սուպերլիգայի ստեղծումից հետո ֆրանսիական «Լիոնի» բաժնետոմսերի գինն ընկել է 0.5 տոկոսով:

Հիշեցնենք, որ եվրոպական 12 առաջատար ակումբներ պաշտոնապես հայտնել են ֆուտբոլի Սուպերլիգայի ստեղծման մասին: Սուպերլիգայի հիմնադիրներն են իտալական «Միլանը», «Ինտերը», «Յուվենտուսը», իսպանական «Բարսելոնան», «Ռեալը», «Աթլետիկոն», անգլիական «Արսենալը», «Մանչեսթեր Սիթին», «Լիվերպուլը», «Տոտենհեմը», «Չելսին» ու «Մանչեսթեր Յունայթեդը»: Սպասվում է, որ հիմնադիրներին կմիանան ևս 3 ակումբներ:

Սուպերլիգայի նախագահ է ընտրվել Մադրիդի «Ռեալի» ղեկավար Ֆլորենտինո Պերեսը, իսկ Թուրինի «Յուվենտուսի» նախագահ Անդրեա Անյելին ու «Մանչեսթեր Յունայթեդի» սեփականատեր Ջոել Գլեյզերը կկատարեն կազմակերպության փոխնախագահի պարտականությունները:

Սուպերլիգայի առաջին մրցաշարը նախատեսված է սկսել օգոստոսին: Կմասնակցեն 20 թիմեր, որոնցից 15-ը լիգայի հիմնադիրներն են: Մյուս 5 մասնակիցները կորոշվեն որակավորման փուլի արդյունքում: Յուրաքանչյուր մասնակից մեկ մրցաշրջանում կանցկացնի 218-23 հանդիպում: Հանդիպումները կանցկացվեն շաբաթվա միջնամասում: 20 թիմեր կբաժանվեն 2 խմբերի և հանդիպումներ կանցկացնեն տանն ու հյուրընկալվելիս: Խմբերում 1-3-րդ տեղ գրաված թիմերը կնվաճեն քառորդ եզրափակիչի ուղեգիր: 4-րդ և 5-րդ տեղ գրաված ակումբները կվիճարկեն քառորդ եզրափակիչի մյուս 2 ուղեգրերը: Փլեյ-օֆֆը կանցկացվի 2 դիմակայությամբ, իսկ եզրափակիչը՝ մեկ խաղով:

Սուպերլիգային միանալու համար ակումբները կստանան 350-ական միլիոն եվրո:

Սուպերլիգան նախատեսում է նաև ապագայում ստեղծել կանանց մրցաշար:

ՈւԵՖԱ-ն, Անգլիայի Պրեմիեր լիգան, Իտալիայի A Սերիան ու Իսպանիայի Լա Լիգան հանդես են եկել միասնական հայտարարությամբ և ակումբներին դատապարտել են Սուպերլիգա ստեղծելու համար: ՖԻՖԱ-ն նույնպես հավանություն չի տվել մրցաշարի անցկացմանը:

Սուպերլիգայի հիմնադիրները հայտնել են, որ մտադիր չեն դադարեցնել իրենց ելույթներն ազգային առաջնություններում:

ՈւԵՖԱ-ի հայտարարության մեջ նշվում է, որ Սուպերլիգայի մասնակիցները կորակազրկվեն և չեն կարողանա մասնակցել որևէ մրցաշարի, իսկ նրանց ֆուտբոլիստներին չի թույլատրվի մեկնել ազգային հավաքականներ: Եթե դա տեղի ունենա, ապա ֆրանսիական ՊՍԺ-ն կճանաչվի Չեմպիոնների լիգայի հաղթող, քանի որ կիսաեզրափակիչ դուրս եկած մյուս 3 ակումբները Սուպերլիգայի հիմնադիրներից են: