Սյունիքում լուրջ խնդիրներ կան՝ անվտանգության համակարգի համատեքստում. Գոռ Գեւորգյան

ԱԺ անկախ պատգամավոր Գոռ Գեւորգյանը պատմական այս ժամանակաշրջանում, երբ Հայաստանը սահմանների հետ կապված խնդիրներ ունի, բացասական է վերաբերվում Ադրբեջանի հետ կոմունիկացիներ ստեղծելուն։ Այս մասին այսօր՝ մարտի 25–ին, Ազգային ժողովում լրագրողների հետ զրույցում ասաց պատգամավորը։

«Այս պահի դրությամբ թշնամական կեցվածք ունեցող պետությունների հետ քննարկել տարանցիկ փոխադրումների մասին, կարծում եմ՝ ժամանակավրեպ է»,– նշեց նա։

2020թ.–ի 44–օրյա պատերազմից հետո էլ Ադրբեջանի նախագահը շարունակում է սպառնալիքներ հնչեցնել Հայաստանի դեմ։ Գոռ Գեւորգյանը նշեց, որ թե՛ Հայաստանը, թե՛ միջազգային հանրությունը պետք է դատապարտեն նմանատիպ հայտարարությունները։

Անդրադառնալով ռազմական գործողությունների ավարտից հետո Սյունիքում ստեղծված իրավիճակին ու իշխանության պնդումներին, թե Սյունիքն անվտանգ է, «Իմ քայլից» դուրս եկած պատգամավորն ասաց.

«Սյունիքում լուրջ խնդիրներ կան՝ անվտանգության համակարգի համատեքստում, շփման գիծն ըստ էության դարձել է անմիջական եւ այս առումով պետք է հսկայածավալ աշխատանքներ տարվեն, հուսով եմ, որ այդ աշխատանքը կատարվում է, որովհետեւ տարբեր հարցեր, երբ բարձրաձայնվում են, պատասխանում են այնքանով, որքանով թույլատրելի է»։