Ինչո՞ւ է Ալիեւին ձեռնտու Փաշինյանի իշխանությունը

Հետպատերազմյան շրջանում ՀՀ իշխանությունները բթացնում են հասարակության զգոնությունը առկա սպառնալիքների հանդեպ եւ առաջ են մղում ադրբեջանա-թուրքական թեզեր, որոնց դեմ հայ ժողովուրդը միշտ պայքարել է: Այս մասին լրագրողների հետ հանդիպմանն ասաց քաղաքագետ, Ադրբեջանի հարցերով փորձագետ Անժելա Էլիբեգովան՝ բացատրելով, որ խոսքը նաեւ Շուշիի պատկանելության վերաբերյալ աղմկահարույց հայտարարությունների մասին է:

Նրա խոսքով՝ մեր հակառակորդները միշտ կօգտագործեն այս թեզերը, նույնիսկ այն ժամանակ, երբ Փաշինյանն ու իր թիմը հեռանան: «Կասեն իբր որ այդ հայտարարություններն արել է ձեր օրինական կառավարությունը: Մնացած փաստարկները նրանց նույնիսկ չեն հետաքրքրի: Ադրբեջանը եւ Թուրքիան երբեք թույլ չեն տա, որ Հայաստանն ուժեղանա, ընդհակառակը, նրանք կգնան տնտեսական ընդլայնման ուղով, եթե հաղորդակցությունները ապաշրջափակվեն: Նրանք դա նույնիսկ չեն թաքցնում:

Ադրբեջանում հասկանում են, որ ամբողջ Ղարաբաղի հարցը լուծված չէ եւ զգուշավորությամբ են վերաբերվում Հայաստանում ռեւանշիստական տրամադրություններին: Իսկ Հայաստանի ներկայիս իշխանությունները այդ տրամադրությունները ճնշելու գործից գլուխ են հանում, օրինակ, Լենա Նազարյանի շուրթերից հայտարարությունների տեսքով»,- ասաց նա: Ադրբեջանը, ըստ քաղաքագետի, ամեն ինչ կանի Հայաստանի ներկայիս իշխանությունների կյանքը երկարացնելու համար, որպեսզի բանավոր պայմանավորվածությունները կատարվեն, եթե դրանք դեռ կան, որպեսզի հայ հասարակությունը մնա թույլ ու ընկճված վիճակում: «Մենք տեսնում ենք, որ Հայաստանի իշխանությունների վարքագծի տարօրինակությունները շարունակվում են, երբ փոխվարչապետ Ավինյանը Շուռնուխ կատարած այցի ժամանակ ասում է, թե խնդիրներ չկան, իսկ հաջորդ օրը ադրբեջանցիները մտնում են Ներքին Խնձորեսկ:

Ինչ վերաբերում է ռազմագերիներին, ապա այստեղ նույնպես շատ անհստակություններ կան՝ ինչո՞ւ են մեր ռազմագերիներն այդքան քիչ: Չե՞նք կարողացել գերի վերցնել, թե՞ պարզապես չեք վերցրել: Նման կասկածները հիմնավորված են նրանով, որ ռուսական կողմն, օրինակ, ասում է, որ մենք առանց նախապայմանների վերադարձնենք ձերբակալված ադրբեջանցի զինծառայողներին»,- ասաց Էլիբեգովան: Փորձագետը նշեց, որ Ալիեւը կապիտալացրեց այս հաղթանակը Ադրբեջանում երկարաժամկետ իշխանության տեսքով: «Մենք հիշում ենք, թե նա որքան էր ուրախանում, որ իբր հաղթել է Ռոբերտ Քոչարյանի եւ Սերժ Սարգսյանի բանակին:

Նրանց, ինչպես նաեւ Մոնթե Մելքոնյանի հետ կապված, ադրբեջանական քարոզչությունը միշտ էլ բարդույթներ է ունեցել: Հայտնի է, որ Ղարաբաղյան առաջին պատերազմի ժամանակ Ադրբեջանը իր տարածքների մեծ մասը կորցրել է Հեյդար Ալիեւի կառավարման օրոք, ով այն ժամանակ համաձայնեց «Դարի գործարքին»՝ նավթի եւ գազի ոլորտը փոխանցելով Արեւմուտքին»,- եզրափակեց նա: