Երեւանի «Արարատը» երկրորդ հաղթանակը տարավ Դուբայում

Երեւանի «Արարատը» Դուբայում ընկերական հանդիպում անցկացրեց Արաբական Միացյալ Էմիրությունների երկրորդ դիվիզիոնը ներկայացնող «Լիվայի» հետ։ Վարդան Բիչախչյանի գլխավորած թիմը հաղթանակ տարավ 4։1 հաշվով։

21–րդ րոպեին եզրից Դավիթ Խուրցիձեի կատարած փոխանցումից հետո ինքնագոլի հեղինակ դարձավ մրցակցի պաշտպանը։ 28–րդ րոպեին Էդգար Մալաքյանն աջ եզրում շրջանցեց մրցակցին ու հիանալի փոխանցում կատարեց, որից հետո Դիմիտրիյե Պոբուլիչը դարձավ գոլի հեղինակ։

62–րդ րոպեին «Լիվան» վաստակեց 11 մետրանոց հարվածի իրավունք և կրճատեց հաշվի տարբերությունը։

Փոխարինման դուրս եկած Սերոժ Թիթիզյանի փոխանցումից հետո 65–րդ րոպեին գոլի հեղինակ դարձավ Ուրոշ Նենադովիչը, որը 5 րոպե անց ձեւակերպեց դուբլ, հաղորդում է «Արարատի» մամուլի ծառայությունը։

Հիշեցնենք, որ հունվարի 30–ին «Արարատը» Դուբայում 7։1 հաշվով հաղթել էր տեղի «Աթլետիկո Արաբիային»։ «Արարատի» մարզումային հավաքն ԱՄԷ–ում կավարտվի փետրվարի 12–ին։