Զոհված զինծառայողների թվային տվյալներին ՊՆ-ն չի տիրապետում. պաշտոնական

Պատերազմի ավարտից 2,5 ամիս անց ՀՀ ՊՆ-ն հայտարարում է, որ չի տիրապետում նահատակված զինվորների վերաբերյալ ամբողջական տվյալներին։ Նկատենք, որ ՀՀ ՊՆ-ն նման հայտարարությամբ պաշտոնապես հանդես է եկել մեր հարցմանն ի պատասխան։

Արդեն տեւական ժամանակ է «Փաստինֆո»-ն փորձում է պաշտոնական աղբյուրներից տեղեկատվություն ստանալ ռազմական գործողությունների ժամանակ զոհված մեր զինվորների իրական թվի վերաբերյալ։

Վերջին երկու ամսվա ընթացքում երկու գրավոր հարցում ենք ուղարկել ՀՀ ՊՆ՝ պաշտոնական տվյալներ ստանալու ակնկալիքով։ Ճիշտ է, 44 օր շարունակ հանրությանը բացահայտ կեղծ տեղեկատվություն տրամադրելուց հետո այլեւս որեւէ վստահություն չկա՝ պաշտոնական տվյալների հավաստիության վրա, այդուհանդերձ նկատի ունենալով, որ տարբեր գործիչներ թվային տվյալներ են հրապարակում մեր կորուստների վերաբերյալ, որոնք հիրավի խիստ անհանգստացնող են, փորձեցինք դրանց վերաբերյալ ստանալ նաեւ պաշտոնական մեկնաբանություն, բայց հերթական անգամ համոզվեցինք, որ իշխանության ղեկին գտնվող անձինք ընդամենը 3 տարի առաջ իրենց ընտրած ժողովրդի հետ անկեղծ լինելու որեւէ ցանկություն չունեն։

Ինչպես արդեն տեղեկացրել ենք՝ 2020 թվականի նոյեմբերին ուղարկված հարցմանն ի պատասխան ՀՀ ՊՆ-ն պետական ու ծառայողական գաղտնիք էր որակել թե անհետ կորածների վերաբերյալ տվյալները, թե Երեւանի մատույցներում խոցված հակառակորդի ԱԹՍ-ների տեսակներն ու թե որ երկրի արտադրանք են դրանք եղել։ Վստահաբար համոզված լինելով, որ այդ տվյալները չեն կարող լինել պետական գաղտնիք 2021 թվականի հունվարի 7-ին երկրորդ հարցումն ուղարկեցինք՝ նորից խնդրելով տեղեկություն տրամադրել մեր զոհերի մասին։

Մասնավորապես ՊՆ-ից ակնկալում էինք ստանալ, թե հունվարի 7-ի դրությամբ քանի նահատակված զինվորի վերաբերյալ ունեն տվյալներ, նրանցից քանիսն են ժամկետային զինծառայող, քանիսը պահեստազորազին, քանիսը կամավոր։ Նույն տվյալներն ակնկալում էինք ստանալ նաեւ անհետ կորածների վերաբերյալ։
Բայց այս անգամ ՀՀ ՊՆ-ն գերազանցեց ինքն իրեն կամ էլ ավելի անկեղծ գտնվեց եւ ուղղակի հայտարարեց, որ այդ տվյալներին չեն տիրապետում՝ միաժամանակ չմոռանալով ավելացնել, որ նաեւ նպատակահարմար չեն գտնում դրանց հրապարակումը։

«Տեղեկացնում ենք, որ զոհված, գտնվելու վայրն անհայտ և ինքնությունը չհաստատված զինծառայողների թվաքանակների ճշգրտման աշխատանքներն ընթացքի մեջ են և տվյալները ներկա դրությամբ ամբողջությամբ հստակեցված չեն, հետևաբար տեղեկատվության տրամադրումը գտնում ենք ոչ նպատակահարմար»,- գրավոր հայտնել է ՀՀ ՊՆ։
Պատասխանից հետեւում է, որ ՀՀ ՊՆ-ն չգիտի թե քանի ժամկետային զինծառայող է ունեցել, որքան մարդ է զորակոչվել պահեստազորից, որքան մարդ է կամավորագրվել եւ նրանցից որքանն են հետ վերադարձել։ Այսինքն՝ միայն այս թվային տվյալների տարբերությունն արդեն իսկ բավարար է պատկերացում կազմել մեր կորուստների վերաբերյալ, հետեւաբար վստահ ենք, որ ՀՀ իշխանությունների ղեկին այսօր գտնվող անձինք տեղյակ են մեր կորուստների իրական պատկերին, ինչը փորձում են ամեն գնով թաքցնել։ Եվ երկրորդ հարցմանն ի պատասխան ՊՆ-ն ավելի անկեղծ է գտնվել՝ առանց այլեւայլության հայտարարելով, որ տվյալների հրապարակումը նպատակահարմար չեն գտնում։

Հիշեցնենք, որ ՀՀ փոխվարչապետ Տիգրան Ավինյանը հունվարի 20-ին խորհրդարանի ամբիոնից հայտնեց, որ դուրս է բերվել 3439 զինծառայողի մարմին, որոնցից դեռևս նույնականացված չեն 766-ը ու երաշխավորեց, որ զոհերի թիվը չի անցնելու 4000-ը։ Այսինքն՝ իշխանություններն իրենց համար սահմանել են առավելագույն թիվ, որի շրջանակներում պետք է սահմանափակվեն։

Հունվարի 14-ին Razm.info-ն հրապարակեց 25 զոհվածի անուն, որոնց մասին պաշտոնական աղբյուրները չեն հայտնել, թեպետ գրեթե բոլորն արդեն հուղարկավորված են։ Ակներեւ է, որ պաշտոնական աղբյուրները ոչ թվային տվյալներ են հրապարակում, ոչ էլ առավել եւս զոհերի ցուցակները՝ իրենց կեղծիքները քողարկելու համար։ Մինչդեռ, պետության պարտքն է՝ անուն առ անուն հրապարակել հանուն հայրենիքի զոհված մեր հայորդիների տվյալները, թե նրանցից յուրաքանչյուրը երբ, որտեղ եւ ինչ պայմաններում է զոհվել, նրանցից յուրաքանչյուրն ինչ սխրանքներ է գործել։ Նրանք ու նրանց ծնողներն արժանի են դրան, ավելին՝ դա անհրաժեշտ է մեր աճող սերնդի դաստիարակության համար։