Կարապետ Չալյան. Հաղթանակներով պետք է հատուցենք իրենց կյանքը հայրենիքին նվիրած մեր հերոսներին
Եվրոպական խաղերի փոխչեմպիոն, Եվրոպայի բրոնզե մեդալակիր, Տոկիոյի Օլիմպիական խաղերի ուղեգիր նվաճած Կարապետ Չալյանի համար 2021 թվականը մարզական կյանքի կարեւորագույն տարին է լինելու:
77 կգ քաշային կարգում Հայաստանի առաջատար ըմբիշը խոստովանում է՝ պատերազմից հետո կրկնակի պատասխանատվությամբ է մոտենալու Օլիմպիական խաղերին, պատասխանատու է՝ ռազմի դաշտում հայրենիքի համար նահատակված հերոսների, պատերազմում զոհված իր հարազատների, ընկերների, վիրավոր զինվորների համար: Վստահ է, որ հաղթանակներով է միայն հնարավոր հատուցել այն մեծ կորուստը, որ ունեցանք պատերազմում:
NEWS.am Sport-ի համար Կարապետ Չալյանն ամփոփել է մրցաշրջան-2020-ը, խոսել կորոնավիրուսի վատ հետեւանքների, պատերազմական օրերի եւ օլիմպիական տարվա ծրագրերի մասին:
Հիշեցնենք, որ 2019 թվականի սեպտեմբերի 16-ին Նուրսուլթանում տեղի ունեցած աշխարհի առաջնությունում Կարապետ Չալյանը նվաճեց Տոկիոյի Օլիմպիական խաղերի ուղեգիր:
Կորոնավիրուսի պանդեմիայի պատճառով հետաձգված Օլիմպիական խաղերը տեղի կունենան 2021թ․ հուլիսի 23-ից օգոստոսի 8-ը:
Մրցաշրջան-2020․․․
2020 թվականը մարզական առումով բավարար էր: Այն արդյունքները, որ ես գրանցեցի, ինձ գոհացնում են: Եվրոպայի առաջնությունում գրավեցի երրորդ տեղ, աշխարհի գավաթում՝ 5-րդ տեղ: Կարող էի մեդալով վերադառնալ, բայց մրցավարական կողմնապահության պատճառով մնացի առանց մեդալ: Եթե չլիներ մրցավարների միջամտությունը կամ դուրս կգայի եզրափակիչ, կամ կգրավեի երրորդ տեղը:
Կորոնավիրուսի համավարակի պատճառով 2020-ում ուսումնամարզական հավաքները ոչ լիարժեք անցկացրինք, բայց այդ պայմաններում կարողացել ենք լավ մարզվել, ուղղակի միջազգային մրցաշարերի չմասնակցեցինք: Ամեն դեպքում այս իրավիճակում երկու խոշոր մրցաշարերի մասնակցությունս ինձ համար լավ է:
Եվրոպայի առաջնությունում երկրորդ անգամ եմ բրոնզե մեդալ նվաճում: Ինձ չի բավարարում երրորդ տեղի արդյունքը: 2020 թվականի Եվրոպայի առաջնությունում պատրաստ էի չեմպիոն դառնալ, բայց էլի ինչ-ինչ պատճառներով չստացվեց: Գոհ եմ, որ առանց մեդալ չվերադարձա Հայաստան:
Աշխարհի գավաթի խաղարկությունում հանդիպեցի կրկնակի օլիմպիական չեմպիոն Ռոման Վլասովին: Հայտնի է, որ նա եղել է Հայաստանում այս քաշում իմ մրցակցի հիմնական մրցակիցը: Բայց դրանից ես չէի լարվել, որովհետեւ բոլոր մրցակիցներիս մոտենում եմ նույն կերպ: Գորգ եմ դուրս գալիս հաղթելու եւ կարեւոր չէ՝ հակառակ կողմում՝ ով է: Ռոման Վլասովը շատ փորձառու ըմբիշ է, կրկնակի օլիմպիական չեմպիոն է, բայց այնպես չի, որ նրան հնարավոր չի հաղթել: Նպատակս նույն էր՝ հաղթել գոտեմարտը: Պետք է դեռ շատ աշխատել, մարզվել, ամեն ինչ անել, լինել մի գլուխ բարձր գորգի վրա, որ հաղթել ոչ միայն մրցակցին, այլեւ մրցավարներին:
Տոկիոյի Օլիմպիական խաղեր...
Կորոնավիրուսի պանդեմիայի պատճառով Օլիմպիական խաղերի հետաձգումը մեկ տարով շատ ազդեց իմ մարզական կարիերայի վրա: Մեկ տարով հետ ընկա: Ինձ նման շատերը կորցրին այս տարին: Մենք շատ լավ էինք սկսել պատրաստվել Օլիմպիական խաղերին: Արդեն գրեթե սկսել էինք հավաքել մարզավիճակ: Կորոնավիրուսը փոխեց բոլորիս ծրագրերը: Բայց դրանից չեմ ընկճվում, ամբողջ համաշխարհային սպորտն է նույն կարգավիճակում հայտնվել:
Բազմիցս ասել եմ, որ ինձ համար շատ կարեւոր էր օլիմպիական ուղեգիր նվաճելը: Սա իմ առաջին Խաղերն է լինելու մարզական կարիերայում: Հույս ունեմ, որ կկարողանամ ինքս իմ, մարզիչներիս, թիմի, տղաների ու ինձանից մեծ ակնկալիքներ ունեցողների սպասելիքներն արդարացնել: Մեծ պատասխանատվությամբ կպատրաստվեմ Տոկիոյին:
Պատերազմ...
Բոլորի նման 2020 թվականը ինձ համար էլ շատ վատ ու բարդ տարի էր: Նախ կորոնավիրուսը, որը փոխեց մեր կյանքը հիմնովին, ապա վրա հասած պատերազմը: Պետք է հոգեպես շատ ուժեղ լինես, որ այդ ամենը կարողանաս տանել, ապրել: Անտանելի ցավոտ օրեր եմ ապրել պատերազմի օրերին, որոնք չեմ ցանկանա նույնիսկ թշնամիներիս: Այս պատերազմը շատ հարազատներ ու մտերիմ ընկերներ տարավ ինձանից: Կուզեի, որ այլեւս երբեք այսպիսի բան հայ ազգը չտեսներ:
Պատերազմը շատ վատ բան է: Չի կարելի պատերազմից որեւէ դաս քաղել, ինչ-որ բան սովորել: Այն ինձ միայն ցավ տվեց, բայց մեծացրեց հաղթելու ու միշտ հաղթող լինելու ցանկությունս: Ես այդ զգացի Սերբիայի մրցագորգում: Հասկացա, որ ինչ-որ բան փոխված է, ավելի շատ եմ ուզում հաղթել, ավելի ու ավելի շատ եմ ուզում մեր դրոշը բարձրացնել, մեր հիմնը հնչեցնել: Մեր մասին աշխարհը շատ պետք է լսի: Այսուհետեւ մենք պետք է հաղթենք, որպեսզի աշխարհը Հայաստանի մասին լսի միայն հաղթանակներով, հաջողություններով: Ու սա միայն սպորտում չէ: Այս հոգեբանությունը պետք է որդեգրենք, որ մենք էլ սկսենք հավատալ մեր ուժերին ու ապագային: Հաղթանակներով պետք է հատուցենք իրենց կյանքը հայրենիքին նվիրած մեր հերոսներին։
2021 թվական...
Ինձ համար կրկնակի պատասխանատու տարի է 2021-ը: Մարզական կարիերայիս համար կարեւորագույն տարին է լինելու, քանի որ մասնակցելու եմ իմ առաջին Օլիմպիական խաղերին: Չեմ կարող ժամանակից շուտ խոստումներ տալ, բայց երկար ու ծանր աշխատանք պետք է անեմ մինչեւ Օլիմպիական խաղեր: Երազանքս Օլիմպիական խաղերին լավ մասնակցելն է, այսինքն՝ մեդալ նվաճելը:
Այս տարին պետք է շրջադարձային լինի Հայաստանի, հայի համար, բոլորիս համար: Ես ինքս այդ շրջադարձը ապահովելու տրամադրվածություն ունեմ: Շատ մարտական եմ տրամադրված, քանի որ Օլիմպիական խաղերում պետք է պատվով ու փառքով ներկայացնենք մեր երկիրը: Հատկապես պատերազմից հետո, այս ծանր պարտությունից, այսքան հերոս տղերք, հարազատ, ընկեր կորցնելուց հետո մենք այլ տարբերակ չունենք, քան հաղթել ու հզորանալ:
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Հայաստանն ու Իրանն աշխատում են սահմանին երկրորդ կամրջի նախագծի վրա
Իրանի հարստացված ուրանի պաշարները միջուկային օբյեկտների փլատակներում են
Եվրամիությունը չի հասկանում Իրանում պատերազմի նպատակները. Կալաս
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Լարիջանիի սպանությունից հետո Իրանը կասետային ռումբերով հարվածել է Թել Ավիվին
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
Երևանում և մարզերում կլինեն էլեկտրաէներգիայի ընդհատումներ
ԱՄԷ նախագահն ու Սաուդյան Արաբիայի թագաժառանգը քննարկել են տարածաշրջանային զարգացումները