Անլրջության գագաթնակետին

Եւ այսպես, Նիկոլ Փաշինյանը հայտարարեց, որ ինքը, կինը եւ երեք դուստրերը վարակվել են կորոնավիրուսով: Տարօրինակ է, բայց այդ մասին նա հայտարարեց ժպիտը դեմքին, հարուցելով Հհ քաղաքացիների զարմանքն ու տարակուսանքը: 

Սրանով, իհարկե, Փաշինյանը եւ նրա ընտանիքի մյուս անդամները չբավարարվեցին: Թեսթը հանձնելուց հետո վարչապետի դուստրերը հանրային վայրում էին՝ Ենոքավանի հանգստյան գոտում, իսկ ինքը՝ արդեն հիվանդության փաստը հայտնի դառնալուց հետո մասնակցեց քննարկումների, խորհրդակցությունների:

Հիմա այսքանից հետո ինչպես շարքային ՀՀ քաղաքացին լուրջ վերաբերվի կորոնավիրուսային համավարակին: ՀՀ քաղաքացին տեսնում է, որ վարչապետը, որը հիվանդ է կորոնավիրուսով, ոչ միայն չի մեկուսացել, ոչ միայն հիվանդանոցում չէ, այլ անում է այն, ինչ անում էր մինչ հիվանդությունը: Ինչ մտածի ՀՀ քաղաքացին կորոնավիրուսի մասին, երբ թեսթը հանձնելուց հետո Փաշինյանի աղջիկներն ապրում են ակտիվ կյանքով: Բնականաբար, ՀՀ քաղաքացին մտածելու է, որ կամ կորոնավիրուսն ամբողջովին հորինվածք է կամ եթե կա էլ, ապա իրենից որեւէ վտանգ չի կարող ներկայացնել:

Իսկապես, եթե կորոնավիրուսը լիներ կամ եթե լիներ ծանր հիվանդություն, ապա Փաշինյանը պետք է որ գոնե մեկուսանար կամ այդ լուրը հայտնելուց ժպիտը դեմքին չլիներ: Հիմա ի՞նչ է ստացվում, որ մի կողմից ժողովրդին պարտադրում են այս շոգին քիմիական բաղադրությամբ ձեռնոցներ կրել, անգամ բաց տարածքներում դիմակ կրել, իսկ իրենք թքած ունեն հիվանդության վրա:

Հիմա նայենք պաշտոնական թվերին եւ այն համադրենք Չինաստանի եւ հարեւան Վրաստանի հետ: Հայաստանում մեկ օրում կորոնավիրուսով վարակվել է ավելի քան 500 մարդ, մահացել 19: Սրանք պաշտոնական թվեր են: Նույն օրը Վրաստանում վարակվել է ընդամենը երկու հոգի: Հիմա ամենակարեւորը: Համավարակի ամբողջ ընթացքում Չինաստանում վարակվել է 85 հազարից էլ քիչ մարդ: Սա նույնն է, եթե Հայաստանում համավարակի ընթացքում վարակվեր ընդամենը 120 մարդ: Հիշեցնենք, որ Չինաստանում 700 անգամ ավելի շատ մարդ է ապրում, քան Հայաստանում:

Հայաստանում մեկ օրում վարակվում է 500-ից ավելի մարդ: Անգամ Վրաստանն է հայտարարում, որ Հայաստանի քաղաքացիների առաջ չի բացի սահմանը: Սա պետության համար ամոթ է: Եւ այսքանից հետո լրջանալու ոչ մի նշան: Ոչ համավարակի դեմն են առնում, ոչ համավարակին լուրջ վերաբերում, բայց մարդկանց կոչ են անում մնալ տանը, այն էլ սովետական տարիները հիշեցնող ձեւական միջոցառումներով, պարտադրում ձեռնոց եւ դիմակ կրել, երբ այդպես էլ որեւէ մեկը չհիմնավորեց, թե ինչու առողջ մարդը պետք է դիմակ կամ ձեռնոց կրի:

Ավելին, մնում է հարց, թե ինչու արտակարգ դրության ամենասկզբում չպահանջվեցին դիմակներ եւ ձեռնոցներ, երբ սուպերմարկետներում իրար գլխի բարձրացած առեւտուր էին անում, երբ փակվել էին շատ հիմնարկներ, խանութներ, սրճարաններ, ռեստորաններ:

Հ.Գ. Լուսանկարն արվել է այն պահին, երբ Նիկոլ Փաշինյանը հայտարարեց, որ կորոնավիրուսով հիվանդ է ինքը եւ ընտանիքի անդամները: Իսկ սա երեւանյան զբոսայգիներից մեկն է: Խանութում, բանկերում մարդկանց շնչահեղձ են անում դիմակներով, իսկ զբոսայգում ծուլանում են մարդկանց հորդորել իրար քիթ չմտնել: Դե արի ու այսքանից հետո պատասխանիր հարցին՝ հիմա կորոնավիրուս կա, թե՝ ոչ:

Գեղամ Նազարյան

Top-News.am