Դատարկագլուխ մարդիկ են ԱԺ-ում, հիմա էլ առաջարկում են արգելել վարկային կազմակերպությունների գովազդը. Շուշանիկ Արևշատյան
Բուքմեյքերական ընկերությունների գովազդներն արգելելու օրենքից հետո, այժմ «Իմ քայլը» խմբակցության պատգամավոր Արտակ Մանուկյանը օրենսդրական նախաձեռնությամբ է հանդես եկել, որով առաջարկում է արգելել վարկային կազմակերպությունների գովազդը հեռուստատեսությամբ, ռադիոյով եւ համացանցում: Այս խնդրի մասին իր ֆեյսբուքյան ուղիղ եթերում խոսել է «Ռադիո Վանի» տնօրեն Շուշանիկ Արեւշատյանը:
«Վերջին 5 ամիսների ընթացքում Հայաստանի գովազդային շուկան սկսեց ցնցվել՝ ինչ-որ պատճառով կամ առանց պատճառի, ավելի շուտ առանց պատճառի: Ցնցումը պայմանավորված է նրանով, որ ԱԺ որոշ երիտասարդ պատգամավորներ, որոնք զբաղեցրել են իրենց բարձր պաշտոնները, փորձում են քայլեր անել ինչ-որ բան փոխելու այս երկրում, լուծել որոշ սոցիալ-տնտեսական հարցեր: Բայց չգիտես ինչու այդ սոցիալ-տնտեսական հարցերի լուծումը տանում է միայն մեկ ուղղությամբ՝ արգելել այս կամ այն գովազդը ռադիոյում կամ հեռուստատեսությամբ»,- ասաց Շուշանիկ Արեւշատյանը:
Նախորդ տարվա նոյեմբերին խորհրդարանում քննարկումներ էին ծավալվել բուքմեյքերական ընկերությունների գործունեության հետ կապված: Ըստ օրենքը հեղինակած պատգամավորների՝ հեռուստատեսությունում եւ ռադիոյում բուքմեյքերական գովազդներ շատ էին, ինչն էլ նպաստում էր խաղացողների թվի աճին:
«Այո, սրա հետ համաձայն եմ, մեծ քանակի գովազդ էր ռադիոյում եւ հեռուստատեսությունում: Մեզ արգելել են այդ գովազդը: Երկար վիճաբանությունից հետո թողեցին ինչ-որ գովազդային ժամանակ ռադիոյում եւ հեռսուստատեսությունում՝ 3 րոպե գովազդ յուրաքանչյուր բուքմեյքերի դեպքում, եւ կարծես աղմուկը դադարեց: Բայց խաղացողների թիվը դրանից ոչ թե նվազեց, այլ ավելացավ: Բուքմեյքերական գովազդները մեծամասամբ տեղափոխվեցին ինտերնետ հարթակ: Այստեղ գործում են օֆշորներում գրանցված ընկերություններ, եւ այդ գովադային բիզնեսի գումարները գնում են Հայաստանից հեռու-հեռու երկրներ»,- նշեց նա:
«Ռադիո Վանի» տնօրենի խոսքով՝ եթե կարելի էր համաձայնել բուքմեյքերական գովազդների սահմանափակման հետ, ապա անտրամաբանական է վարկային կազմակերպությունների գովազդների արգելքը:
«Այս տարվա սկզբին պարոն Արտակ Մանուկյանը, ինչպես պարզվեց ԱԺ պատգամավոր, արթնացավ եւ որոշեց միանգամից լուծել մեկ այլ սոցիալ-տնտեսական խնդիր՝ վարկային կազմակերպությունների եւ բանկերի գովազդների հարցը, որոնք ինչ-որ տոկոսներով վարկ են տրամադրում: Որոշեց լուծել այս հարցը եւ ոչ այլ կերպ, քան գովազդի արգելքով: Այսինքն` չի լինի վարկային կազմակերպությունների, բանկերի գովազդ, չի լինի խնդիր՝ «չկա մարդ, չկա խնդիր»: Բայց խնդիրը մնում է, խնդիրը լիովին այլ հարթությունում է»,- ասաց նա:
Շուշանիկ Արեւշատյանի փոխանցմամբ՝ օրինագծով նախատեսվում է արգելել սպառողական վարկերի տրամադրման ցանկացած տեսակի գովազդ, այդ թվում ռադիոյով, հեռուստատեսությամբ, բջջային կապի միջոցով եւ համացանցում:
«Թե ինչու Արտակ Մանուկյանը հանկարծ վատ երազում տեսավ եւ որոշեց փակել վարկային կազմակերպությունների գովազդը Հայաստանի գովազդային շուկայում, հիմնավորումը պարզ է՝ մարդիկ ընկնում են մեծ վարկերի տակ, վարկային կազմակերպությունները բարեխիղճ չեն կատարում իրենց պարտավորությունները, խաբում են մարդկանց: Պարո՛ն Մանուկյան, արթնացե՛ք, ի՞նչ կապ ունի այստեղ գովազդը, այն կատարում է լիովին այլ գործառույթ: Եթե դրա մասին չգիտեք, եկեք մեզ մոտ մաստեր-կլասի, մենք 2 ժամում ձեզ կպատմենք՝ ինչ է գովազդ, ինչպիսին է դրա ազդեցությունը եւ որն է ընդհանրապես գովազդի գործառույթը»,- նշեց ռադիոընկերության տնօրենը:
Նրա կարծիքով՝ վարկային կազմակերպությունների կողմից բնակչությանը բարձր տոկոսադրույքներով վարկեր տրամադրելու խնդրի հարցում գովազդների արգելքը վերջին օղակն է:
«Եթե դուք ուզում եք օգնել ժողովրդին, ապա դուք ճիշտ տեղից չեք սկսել, խնդիրը գովազդը չէ: Դուք լուծում եմ Հայաստանի բնակչության ահռելի ֆինանսական խնդիրը գովազդի վրա արգելք դնելո՞վ: Դուք այնքան թույլ եք, որ չեք կարող ֆինանսների նախարարության, Կենտրոնական բանկի միջոցով ազդել վարկային կազմակերպությունների վրա, որոնք տրամադրում են անբարեխիղճ, ինչպես ձեզ է թվում, գովազդ եւ տոկոսադրույքների հարցում խաբում են ժողովրդին: Եվ որոշում եք ուղղակի փակել գովազդը հեռուստատեսությամբ եւ ռադիոյով, իսկ ամեն քայլափոխի, բոլոր սուպերմարկետներում թողնել այդ վարկային կազմակերպությունները: Սա նորմա՞լ երեւույթ է»,- ասաց Շուշանիկ Արեւշատյանը:
«Ռադիո Վանի» տնօրենը նաեւ հարց է բարձրացնում, թե ինչու մինչեւ օրինագծի ներկայացումը քննարկումներ չեն անցկացվել հեռուստառադիոընկերությունների հետ:
«Ես ուզում եմ հասկանալ՝ դուք ի՞նչ նպատակ եք հետապնդում, ձեր խնդիրը ո՞րն է: Ուզում եք փակե՞լ զլմ-ները, ուզում եք դատարկե՞լ մեր գրպանները, փակե՞նք աշխատատեղերը, դադարե՞նք հարկեր վճարել: Դուք արդեն մեզ հոգնեցրել եք, հանգիստ թողեք մեզ, թողեք հանգիստ ապրենք եւ աշխատենք: Մենք աջակցել ենք հեղափոխությանը, բայց չէինք ուզում, որ լիներ այսպիսի արդյունք: Եթե դատարկագլուխ մարդիկ նստած են խորհրդարանում եւ չեն հասկանում այն օրենքները, որն իրենք էլ մտածում են, ինքներդ ձեզ մեղադրեք»,- նշեց Շուշանիկ Արեւշատյանը:
Եվրամիությունը չի հասկանում Իրանում պատերազմի նպատակները. Կալաս
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Մարմնամարզության տղամարդկանց հավաքականը տուն է վերադառնում
Ղարաբաղից տեղահանվածները պետք է կապեն իրենց ապագան Հայաստանի հետ
Պետական արգելոցի ֆոտոթակարդները կրկին նկարահանել են կովկասյան ընձառյուծին
Ստեփանծմինդա-Լարս ավտոճանապարհը փակ է
Գվարդիոլան արդեն այնքան հանդիպումներ է անցկացրել, որ ես չեմ համարձակվի նրան խորհուրդներ տալ
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...