Երկիր, որտեղ Պուտին-Թրամփ հանդիպումն իրադարձություն չէ

Արդեն մի քանի օր է՝ աշխարհի թիվ մեկ իրադարձությունը Ճապոնիայում կայացած Պուտին-Թրամփ մեկուկես ժամանոց հանդիպումն է: Աշխարհի, բայց ոչ Հայաստանի համար:

ՌԴ եւ ԱՄՆ նախագահների հանդիպումը դարձել է ոչ միայն Ռուսաստանի եւ ԱՄՆ-ի, այլ նաեւ աշխարհի բազմաթիվ երկրների լրագրողների, քաղաքագետների, փորձագետների թիվ մեկ քննարկվող թեման:

Աշխարհը փորձում է հասկանալ, թե այդ ինչի շուրջ են համաձայնության եկել Թրամփն ու Պուտինը, որ այդքան գոհ դուրս եկան բանակցությունների սեղանից, եւ ինչ հետեւանքներ կունենան այդ պայմանավորվածություններն աշխարհի համար: Աշխարհը, բայց ոչ Հայաստանը:

Արցախի խնդիր, Իրանի հետ սահման ունեցող, Թուրքիայի հետ հարաբերություններ չունեցող Հայաստանում Թրամփ-Պուտին հանդիպումն անտեսվեց: Մեր հանրության, լրատվամիջոցների ճնշող մեծամասնոսւթյան համար այդ հանդիպումն ավելի անկարեւոր էր, քան Ձախ Հարութի համերգը, որից անգամ լայվ էր մտել թիվ մեկ պաշտոնյան:

Տարիներ առաջ Հայաստանում Ֆրանսիայի դեսպան (1996-2001թ.թ.) Միշել Լեգրան, որը հաճախ դիվանագիտությունը մի կողմ էր դնում եւ ասում այն, ինչ մտածում էր, քանի որ իրոք սիրում էր Հայաստանն ու հայ ժողովրդին, ասուլիսներից մեկի ժամանակ ասաց, թե հայերը, հայաստանցիները շարունակում են իրենց զգալ մեծ երկրի ծայրագավառի բնակիչներ:

Նա իր պնդումը հիմնավորեց այսպես. «Հայաստանում մամուլը միջազգային իրադարձություններին շատ քիչ տեղ է հատկացնում, լրատվամիջոցներ կան, որ անգամ միջազգային իրադարձություններին էջ չեն տրամադրում, քանի որ դուք ձեզ դեռ առանձին երկիր չեք զգում, դուք ձեզ համարում եք մեծ երկրի ծայրագավառի բնակիչներ, որոնց հետաքրքիր են բացառապես իրենց նեղ, հիմնականում կենցաղային խնդիրները»:

Լեգրան ասաց, որ ֆրանսիացին առաջինը ծանոթանում է միջազգային իրադարձուրթյուններին, քանի որ իրեն պատասխանատու է համարում ամբողջ աշխարհի համար: 

Միշել Լեգրայի ասուլիսից անցել է մոտ քսան տարի. ցավոք մտածողության առումով գրեթե ոչինչ կամ ոչինչ չի փոխվել: Մեզ համար ավելի կարեւոր է ոչ թե Թրամփ-Պուտին հանդիպումը, որտեղ ձեռք բերած համաձայնություններից կամ հակառակը կախված է լինելու նաեւ Հայաստանի հետագա ընթացքը, Արցախի հարցի կարգավորումը, այլ Երեւանի քաղաքապետի անկիրթ խոսնակի զզվելի արտահայտությունները:

Մեր հանրության, անգամ լրատվամիջոցների համար կարեւոր է ոչ թե Մինսկի խմբի համանախագահների հայտարարությունը, այլ նվազագույն աշխատավարձը մի քանի հազարով բարձրացնելու խոստումը, ընդ որում, դա էլ քննարկում են առանց հաշվի առնելու դրամի հնարավոր արժեզրկումը եւ սպառողական նվազագույն զամբյուղի արժեքի փոփոխումը:

Ի՞նչ Թրամփ-Պուտին հանդիպում, ինչ Իրանի շուրջ տեղի ունեցող զարգացումներ: Մեր հանրության եւ մամուլի, սուպերնախարարներից մեկի համար ավելի, շատ ավելի կարեւոր է, թե ինչու մի երգիչ համարձակվեց երգել Սերժ Սարգսյանի համար: 

Նրանք, ովքեր չեն նկատում Պուտին-Թրամփ հանդիպումը, դեռ մեկ տարի առաջ անարգանքի սյունին գամեցին Ձախ Հարութին Սերժ Սարգսյանի հետ բարեւելիս խոնհարվելու համար, իսկ հիմա մոռացած այդ մասին սիրում են Ձախ Հարութին: Նրանք, ովքեր դեռ մեկ տարի առաջ սիրում եւ գովերգում էին Նիկոլի մասին երգեր հյուսող երգիչներին եւ ռեփերներին, հանկարծ ատում են Սերժ Սարգսյանի մասին երգողներին: Իսկ նրանք պետական բարձր պաշտոնյաներ են, անգամ նախարարներ:

Անգամ ադրբեջանական մամուլն է ԱՄՆ-ի եւ Ռուսաստանի նախագահների հանդիպումից հետո հեղեղված վերլուծություններով, հարցազրույցներով: Նրանք փորձում են հասկանալ, թե ինչ ազդեցություն է ունենալու Իրանի եւ Արցախի խնդրի կարգավորման վրա այդ հանդիպումը: Սա Ադրբեջանում, իսկ Հայաստանում Թրամփ-Պուտին հանդիպումից միլիոնավոր անգամ կարեւոր է այն արջը, որը հինգ ճագարի էր վնասել:

Մենք առանց վերլուծելու անցնում ենք Մինսկի խմբի համանախագահների հայտարարության կողքով, մենք շատ արագ մոռանում ենք ԵԽԽՎ-ում հայաստանյան պատվիրակության քվեարկությունը, մենք լուրջ չենք վերաբերում Իրանի շուրջ տեղի ունեցող իրադարձություններին եւ չենք փորձում հաշվարկել հնարավոր ռիսկերն ու վնասները, եւ մենք այսքանից հետո չէինք կարող լուրջ վերաբերել Թրամփ-Պուտին հանդիպմանը:

Ավելի պարզ լինելու համար ասենք, որ մեր վերաբերմունքը Ռուսաստանի եւ ԱՄՆ-ի նախագահների հանդիպամնը նույնն է, եթե Հանրային հեռուստաալիքը ֆուտբոլի աշխարհի առաջնության եզրափակիչ փուլի խաղերի փոխարեն հեռարձակի Լիլիթ Հովհաննիսյանի համերգները, իսկ հանրությունն էլ դա շատ նորմալ կհամարի:

Այսպիսին ենք մենք, այսպիսին է մեր հանրությունը, բնականաբար, դրանից բխող բոլոր հետեւանքներով:

Գեղամ Նազարյան

Top-News.am      

Բաժանորդագրվեք Top-News.am-ին Telegram-ում