Օրհներգը թաշկինակ չէ, որ երբ ուզենք փոխենք

Պետություն կառավարելը լուրջ գործ է, շատ լուրջ գործ: Պետություն կառավարելը ոչ սրամիտների մրցույթ է, ոչ անգլերենի օլիմպիադա, եւ ոչ էլ թերթում մի անգամ քննադատական հոդված գրել:

Պետություն կառավարելու համար նախ եւ առաջ քաղաքական մեծ փորձ պետք է ունենալ եւ պետական մտածողություն: Եւ երբ լինի այդ փորձը եւ պետական մտածողությունը, ապա երբեք չի առաջանա պետության օրհներգը փոխելու մտադրություն:

Միանգամից ասենք, որ չենք մտնում այն քննարկումների մեջ, թե օրհներգի երաժշտությունը բարձրակարգ է, թե ոչ: Ֆրանսիացիները վաղուց գիտեն, որ իրենց օրհներգի երաժշտությունը եւս պարզունակ է, բայց Ֆրանսիան ղեկավարում են պետական մտածողություն ունեցող մարդիկ: Նրանք գիտեն ինչ է պատմությունը, ինչ է ժառանգությունը, ինչ է պետությունը:

Այո, Արամ Խաչատրյանի երաժշտությունը շատ ավելի լավն է, բայց ոչ մի դեպքում չի կարելի վերականգնել խորհրդային որեւէ սիմվոլիկա: Հետո հիշեք, որ մենք 1990 թվականի օգոստոսին, ի տարբերություն 2019-ի հունվարի, ունեինք մի խորհրդարան, որը լեցուն էր մտավորականներով, գիտնականներով, պատմություն իմացողներով եւ բուռն քննարկումների արդյունքում կանգ առան հենց այն օրհներգի, զինանշանի եւ դրոշի վրա, որը եւ ունենք:

Իսկ Մակունցը, որը ղեկավարում է կառավարող կուսակցության խմբակցությունը, դեռ շատ երկար ճանապարհ պետք է անցնի, հասունանա, գիտելիքներ ձեռք բերի, հասկանա, թե ինչ է քաղաքականությունը, պետությունը, եւ որ նոր միայն իրեն իրավունք վերապահի արտահայտվել օրհներգի վերաբերյալ:

Իսկ հիմա պարզապես ամաչում ես այն խմբակցության փոխարեն, որի ղեկավարն ասում է, թե գործող հիմնը իր մոտ հարցեր է առաջացնում եւ չունի այն ուղերձները, որոնք կուզենար, որ լինեին։

Սա իսկական անեկդոտ է: Եւ եթե կառավարող ուժը ցանկանում է այլեւս նման անեկդոտների հեղինակ չդառնա, ապա օր առաջ այս աղջնակին պետք է ազատի այն բեռից, որն իր համար չէ:

Հասկանո՞ւմ եք, ինչ վիճակում, ինչ սկանդալում կհայտնվի այն գործիչը եւ այն կուսակցությունը ԱՄՆ-ում, Ֆրանսիայում, Ճապոնիայում, որի ներկայացուցիչը կրկնի Մակունցի խոսքերը:

Թարգեք այս խաղը, դրոշը, օրհներգը, զինանշանը հանգիստ թողեք եւ զբաղվեք ավելի կոնկրետ գործով: Ֆրանսիան, Ճապոնիան, Բրազիլիան, Ուրուգվայը, Իտալիան մեզնից շատ ավելի հարուստ երկիր են եւ հաստատ վաղուց կարող էին փոխել իրենց օրհներգները, բայց այնտեղ գիտեն, թե ինչ է պետությունը եւ պետության կառավարմամբ մակունցները չեն զբաղվում:

Top-News.am