ՀՀԿ-ի միտքը, խիղճը եւ պատիվը. Արմեն Աշոտյան

Բոլոր նրանք, ովքեր ինչ-ինչ պատճառներով մտածում են ապրիլի 2-ին կայանալիք ընտրություններում քվեարկել ՀՀԿ-ի ռեյտինգային ընտրացուցակում հայտնված այս կամ այն թեկնածուի օգտին, որոշում կայացնելուց առաջ պետք է գիտակցեն, որ քվեարկում են, որ Արմեն Աշոտյանը հայտնվի խորհրդարանում:

Իսկ ինչու հերթական անգամ հիշեցինք Արմեն Աշոտյանին: Պատճառն այն է, որ ՀՀԿ փոխնախագահը անդրադառնալով Ջրառատի խայտառակ իրադարձություններին մի քանի ուշագրավ հայտարարություններ է արել:

Այսպես, «Ազատություն» ռադիոկայանի թղթակցը Աշոտյանին առաջարկում է գնահատել իրավիճակը Ջրառատում, հաշվի առնելով, որ իշխող Հանրապետականի նախընտրական կարգախոսը հենց այդպիսին է՝ «Անվտանգություն եւ առաջընթաց»:

Եւ այստեղ Արմեն Աշոտյանը միանգամից հայտարարում է, թե խնդիրը գտնվում է բացառապես իրավապահ մարմինների իրավական, օրենսդրական կարգավորումների դաշտում:

Իրականում խնդիրը ՀՀԿ-ի ներսում է: Եթե Արմեն Աշոտյանն ու ՀՀԿ մյուս ղեկավարները երկրում այսպիսի մթնոլորտ չստեղծեին, եթե Երանոսյան եղբայրները պատժվեին, եւ ոչ թե պարգեւատրվեին Սարի թաղի դեպքերից հետո, ապա չէին լինի նաեւ Ջրառատի այս իրադարձությունները:

Դատելով Աշոտյանի հայտարարություններից, ՀՀԿ-ն որոշել է մնալ ցինիզմի դաշտում, ինչը հղի է անկանխատեսելի հետեւանքներով:

«Հանրապետականը կարիք չունի օրենքների խախտումով իրականացնելու քարոզարշավ եւ գնալու ընտրությունների»,- ասել է Աշոտյանը: Սա այն դեպքն է, երբ ասում են՝ մեկնաբանություններն ավելորդ են:

Զավեշտն այն է, որ «Օհանյան-Րաֆֆի-Օսկանյան» դաշինքի նախընտրական հանդիպման ժամանակ եւ հետո դաշինքի ակտիվիստների դեմ տեղի է ունեցել բռնություն, որն ուղեկցվել է ատրճանակի եւ ինքնաձիգի կրակոցներով, կան վիրավորներ, բայց կարկառուն ՀՀԿ-ական Աշոտյանը հայտարարում է, թե  քաղաքական գնահատականներ հնչեցնելու կարիք այս պահին բացարձակապես չկա:

«Միաժամանակ մի հանգամանք էլ հաշվի առնենք․ բացարձակապես չեմ ուզում շեշտադրել տվյալ դեպքը, բայց առհասարակ չի կարելի բացառել, որ համայնքներում կան տարբեր բնակիչների, քաղաքացիների միջեւ վաղուց կուտակված որոշակի խնդիրներ, որոնք կարող են ընտրությունների առիթով եւս մեկ անգամ սրվել: Եվ այդ սրացումները կապել քաղաքական գործընթացների հետ, կարծում եմ, այդքան էլ ճիշտ չէ»,- ասել է Աշոտյանը, իսկ մենք ասում ենք՝ ծիծաղելի է, իրոք ծիծաղելի է:

ԽՍՀՄ վերջին տարիներին, երբ Ֆերգանայում ուզբեկների եւ տաջիկների միջեւ զանգվածային բախում տեղի ունեցավ, ԽՄԿԿ-ն ասում էր, թե շուկայում ելակի գնի շուրջ վեճ է եղել: Հիմա նույնը իր կառավարման վերջին ամիսներին անում է ՀՀԿ-ն:

Այսպես երկիր հնարավոր չէ ղեկավարել: ՀՀԿ-ն իրեն վաղուց սպառել է, ՀՀԿ-ն պետք է հեռանա: Սա բխում է հայ ժողովրդի, ՀՀ քաղաքացիների եւ մեր պետության շահերից:

Արմեն Աշոտյանն ասում է, թե «Օհանյան-Րաֆֆի-Օսկանյան» դաշինքը ցանկանում է իր վարկանիշը բարձրացնել հակադրվելով քաղաքական ամենամեծ եւ հավակնություններ ունեցող իշխանական ուժին:

Ընդամենը շեշտենք, որ նախ ՀՀԿ-ն հեռու է քաղաքական ուժ լինելուց, եւ բացի այդ Ջրառատում ՀՀԿ-ն ջանք ու եռանդ չի խնայել ՕՐՕ դաշինքին հակադրվելու համար, գուցե իր շարքերի մարտական ոգին բարձրացնելու համար:

Եւ ամենավերջում կրկին ցանկանում ենք շեշտել, որ բոլոր նրանք, ովքեր պատրաստվում են ձայն տալ ՀՀԿ ռեյտինգային թեկնածուներից որեւէ մեկին, պետք է գիտակցեն, որ նախ եւ առաջ քվեարկում են հենց Արմեն Աշոտյանի օգտին: Մեկ անգամ եւս նայեք նրա լուսանկարին, եւ որոշեք, թե պետք է արդյոք գնալ նման քայլի, թե՝ ոչ:

Գագիկ Մարտիրոսյան

Այս թեմայով Կարճ անդրադառնամ հիմանական հարցերին Նիկոլը ձեռնտու էր բոլորին, բացի Հայաստանից Ես խղճիս հետ եմ գաղտնի պայմանագիր կնքել, որով քեզ պատժելու եմ.Արմեն Աշոտյան Այսօր հաստատվեց՝ գաղտնի փաստաթղթեր կան ստորագրված՝ Հայաստանի ազգային շահերի հաշվին․ Արմեն Աշոտյան Այս պահին մեզ համար հերթական գաղտնի գործարքն է հյուսվում դավաճան կառավարության կողմից. Արմեն Աշոտյան