Կիևում ազգայնականները հարձակվել են առևտրի կենտրոնի վրա՝ հայտարարելով, որ այն «ռուսաստանյան բիզնես է» (լուսանկարներ)

Կիևում ավելի քան 200 ազգայնական ներխուժել է Ocean Plaza առևտրի և զվարճանքի կենտրոնի տարածք ու պահանջել փակել այն՝ հայտարարելով, որ այն պատկանում է ռուսաստանցի գործարարի, այս մասին հաղորդում է ուկրաինական 24 TV հեռուստաալիքը:

Նշվում է, որ առևտրի կենտրոն ներխուժած ծայրահեղականները հայտարարել են, որ իրենց վերահսկողության տակ են վերցնում տարածքը: Ոստիկանությունը փորձել է խանգարել նրանց՝ ազգայնականներին շրջափակման մեջ վերցնելով և փորձելով դուրս բերել նրանց շենքից:

Դեպքի վայրում արված լուսանկարներից երևում է, որ ազգայնականները բազմաթիվ հակառուսական գրություններ են թողել առևտրի կենտրոնի պատերի և դռների վրա, ինչպես, օրինակ, «արյան վրա դիզված փողեր», «Չքվի՛ր, Ռուսաստա՛ն», «Russia, Goodbye»:

Ocean Plaza-ի պաշտոնական ֆեյսբուքյան էջում հաղորդվում է, որ ազգայնականները շենքի ներսում կրկին գործի են դրել ծխի ռումբեր, իրավապահները ստիպված են եղել տարհանել մարդկանց:

Հիշեցնենք, որ ազգայնականները ծխի ռումբերով հարձակվել էին շենքի վրա նաև նախորդ օրը: