Դատարանում ծագած վիճաբանությունը վերածվել է զանգվածային ծեծկռտուքի. ձերբակալվել է 49 մարդ

Օդեսայի Պրիմորսկի շրջանային դատարանում դատավարությանը մասնակցող կողմերի աջակիցների միջև ծեծկռտուք է տեղի ունեցել, որից հետո ոստիկանական բաժանմունք է տեղափոխվել 49 մարդ: Այս մասին հաղորդում է РИА Новости-ն՝ հղում անելով Ազգային ոստիկանության տարածաշրջանային վարչության մամուլի ծառայությանը:

«Այսօր (նոյեմբերի 23-ին - Tert.am) Օդեսայի Պրիմորսկի շրջանային դատարանում դատավարության ժամանակ մասնակից կողմերին աջակցող խմբերի միջև ընդհարում է տեղի ունեցել, որը վերածվել է ծեծկռտուքի», - ասվում է մամուլի ծառայության հաղորդագրության մեջ: Նշվում է, որ արդյունքում 49 մարդ է ձերբակալվել, որոնք տեղափոխվել են ոստիկանական բաժանմունք՝ միջադեպի բոլոր հանգամանքները պարզելու համար:

Ոստիկանության տվյալներով՝ ձերբակալվածների մեծ մասն Օդեսա է ժամանել Ուկրաինայի այլ շրջաններից: Այժմ իրավապահ մարմինները պարզում են նրանց ժամանման նպատակը: