Վարդան Մինասյանը հաստատ խաղը չի դիտել

Մակեդոնիա-Հայաստան խայտառակ, ամոթալի, ստորացուցիչ խաղից հետո ոչ թե ներողություն է խնդրել, ոչ թե հրաժարական է տվել այլ նայելով լրագրողների աչքերին ասել է. «Ունենք թիմային խաղ, բայց պիտի բարելավենք որակը։ Պիտի օգտագործեինք մեր հնարավորությունները»:

Մինասյանը նման հայտարարություն կաներ, եթե ականատես չլիներ Մակեդոնիա-Հայաստան խաղին, բայց մենք նրան մարզադաշտում տեսել ենք: Անկեղծ, լավ կլիներ, եթե Մինասյանը նման հայտարարություն աներ խաղը չտեսած, բայց երբ խաղադաշտում է եղել, տեսել խայտառակությունը եւ նման հայտարարություն անում, ստիպված ենք մտածել, որ նա կամ ֆուտբոլից ոչինչ չի հասկանում կամ պարզապես ծաղրում է ֆուտբոլասերներին:

Ոչ թիմային խաղ կար, ոչ էլ մեծ հաշվով պահեր: Եղավ մի պահ, այն էլ մրցակցի պաշտպանի կոպիտ սխալից հետո եւ եւս մեկ կիսապահ խաղի ամենավերջում: Մինասյանի Երեւան վերադառնալուց հետո սպասում ենք, որ նա անկեղծորեն բացատրի, թե ինչու է ծաղրում հայ ֆուտբոլասերին:

«Մակեդոնիան չզարմացրեց։ Մենք պատրաստի մարտավարություն էինք ընտրել, որպեսզի առաջին խաղակեսում գոլ խփենք, բայց չկարողացանք։ Երկրորդ խաղակեսում փոխեցինք մարտավարությունը, բայց կրկին չստացվեց»,- ասել է Մինասյանը:

Պատկերացնո՞ւմ եք, թե ինչ էր լինելու, եթե հանկարծ մակեդոնացիները որոշեին զարմացնել: Ինչ վերաբերում է պատրաստի մարտավարությանը, ապա այն ինչ ցուցադրեցին մեր հավաքականի ֆուտբոլիստները, ոչ թե մարտավարություն էր, այլ սովորական խայտառակություն:

Նա ասում է, թե Մակեդոնիան ունեցավ երկուս ու կես պահ եւ երկու գոլ խփեց: Մնում է ուրախ լինենք, որ մակեդոնացիները ցանկություն չունեցան շատ պահեր ունենալ:

Մինասյանը խաղավերջում բավական բարձր տրամադրություն ուներ: Ուրախ էր, կատակում էր, իսկ մամուլի ասուլիսի ժամանակ խոստովանեց, որ տեսել է թիմային խաղ, պահեր, որոնք չեն օգտագործվել: 

Տխուր է: Շատ տխուր, որ նման մարզիչ ունի Հայաստանի ազգային հավաքականը եւ նման ֆուտբոլիստներ:

Սլավա Բաղդասարյան

Top-News.am