ԱՄՆ-ի սենատորները ցանկանում են արգելափակել F-35 կործանիչների վաճառքը Թուրքիային

ԱՄՆ-ի սենատորները ցանկանում են արգելափակել Թուրքիային F-35 Lightning II կործանիչների վաճառքը ամերիկյան բողոքական քահանա Էնդրյու Բրանսոնի դեմ դատավարության կապակցությամբ, գրում է The Hill-ը:

Սենատորներ Ջեյմս Լենքֆորդը, Ժաննա Շահինը եւ Թոմ Թիլիսը ներկայացրել են Թուրքիային F-35 կործանիչների փոխանցման կանխարգելման մասին օրինագիծը: Ենթադրվում է, որ Թուրքիան 116 F-35A կործանիչներ կգնի:

Սենատոր Լենքֆորդն իր հայտարարության մեջ նշել է, որ Թուրքիայի նախագահ Ռեջեփ Թայիփ Էրդողանը «շարունակել է խելացնոր կառավարման եւ օրենքի գերակայության անտեսման ուղին, ինչի կապակցությամբ F-35-ի փոխանցումը ավելի ռիսկային է դարձել: «Թուրքիայի ռազմավարական լուծումները, ցավոք, ավելի ու ավելի շատ չեն համապատասխանում պահանջներին, երբեմն էլ հակասում են Միացյալ Նահանգների շահերին», - շարունակել է նա:

Սենատոր Թիլիսն ասել է, որ «Էրդողանի կառավարությունը պետք է հասկանա, որ Կոնգրեսը միջոցներ կձեռնարկի ամերիկացի քաղաքացիների շահերը պաշտպանելու համար, այդ թվում` Թուրքիային F-35 փոխանցման կանխումը»: