Ադրբեջանը չի կարող օգտվել ՌԴ-ի կողմից Թուրքիային տրամադրվող C-400-ից. Իգոր Կորոտչենկո

Թուրքիան կստանա C-400 հակազենիթային հրթիռային համակարգերը Ռուսաստանից, բայց նրան չի թույլատրվի որևէ այլ երկրի տալ դրանից օգտվելու հնարավորություն. հայաստանյան լրագրողների հետ տեսակամուրջով հանդիպմանն այսպես ասաց Զենքի համաշխարհային վաճառքի վերլուծության կենտրոնի տնօրեն, «Ազգային պաշտպանություն» ամսագրի գլխավոր խմբագիր, գնդապետ Իգոր Կորոտչենկոն:

«Էրդողանը դա չի կարող տրամադրել որևէ այլ երկրի, այդ թվում՝ Ադրբեջանին»,- համոզմունք հայտնեց նա:

Անդրադառնալով Ադրբեջանի զենք գնելու նախընտրություններին` Իգոր Կորոտչենկոն նկատեց, որ հիմա այդ երկիրը շատ լրջորեն է վերաբերվում իր կապերին Իսրայելի հետ և հիմնականում դիտարկում է նրանից անօդաչու թռչող սարքեր գնելու հնարավորությունը:

Իսկ թե ինչպես պետք է Հայաստանը դրանց դեմ դիմակայի` ռազմական փորձագետը մատնանշեց, որ Панцирь С-1 համակարգով և ТОРН-М-ով, որն ավելի թանկարժեք է:

«Կարծում եմ, որ Ռուսաստանի կողմից Հայաստանին տրված վարկի շրջանակներում ձեր զինվորականները կարող են գնել այս զենքերը՝ քչացնելով Հայաստանի օդային սահմանին սպառնացող վտանգները»,- ասաց նա:

Իգոր Կորոտչենկոն անդրադառնալով նաև այսօր Հայաստանում տեղի ունեցող ներքաղաքական իրադարձություններին` նշեց, որ իրենք էլ են անհանգստացած այստեղի իրադարձություններով: Ռուս փորձագետի խոսքով՝ իրենց համար կարևոր է, որ Հայաստանում խնդիրներ չլինեն:

«Բոլոր հետսովետական երկրների միջից ես Հայաստանին առաջին տեղում կդնեի»,- ասաց նա՝ հավելելով, որ Ռուսաստանը շարունակելու է Հայաստանի հետ համագործակցել, Հայաստանը կստանա Ռուսաստանից ժամանակակից զենքեր, որը թույլ չի տա, որ եղած ռազմական բալանսը խաթարվի: